शाय होपाचो शेंकडोः वेस्ट इंडिजाच्यो दुसरे वन-डेंत  6 बाद 311 धांवड्यो

भांगरभूंय | प्रतिनिधी

खबरां संस्था
त्रिनिदादः विकेटकीपर ओपनर शाय होपाचो शेंकडो ( 115 ) आनी ताणे निकोलस पुरन (74) हाच्या वांगडा चवथे विकेटी खातीर केल्ले 117 धांवड्याचे भागिदारी लागून पोर्ट ऑफ स्पेनाच्या क्वीन्स ओव्हल पार्का वयले दुसरे वन-डे मॅचींत वेस्ट इंडिज टॉस जिखून बॅटींग करून आपल्या 50 ओव्हरींत 311  धांवड्यो केल्यो. शाय होप हाचो शेंकडो हें तांच्या डावातलें खाशेलेपण आशिल्ले. ताणे 135 बॉलांत 8 चौके आनी 3 सक्यांनी 115 धांवड्यो केल्या. पंगडाक 300 धांवड्याचेर व्हेल्या उपरांत शार्दुल ठाकूरान ताका क्लीन बोल्ड केलो.
शाय होप आनी कार्ल मेयरान 65 धांवड्यांची सलामी दिल्या उपरांत होपान शामरा ब्रुक वांगडा दुसरे विकेटी खातीर 62 धांवड्यांची भागिदारी करून धांवसंख्या 127चेर व्हेली.  मेयरान 23 बॉलांत 6 चौके आनी एक सक्यान 39 धांवड्यो केल्यो जाल्यार  ब्रुकान 5 चौक्यांनी 36 बॉलांत 35 धांवड्यो केल्यो. ब्रॅडन किंगान शून्यार बाद जाल्या उपरांत होप आनी पुरन ही जोडी जमली आनी तांणी भारताच्या बॉलरांक  फोडून काडलें. 3 बाद 130 उपरांत पंगडाचो दोट्टी शेंकडो (247) केल्या उपरांत शार्दुल ठाकूरान पुरनाम आवट केलो. ताणे 6 सके आनी एका चौक्यान 77 बॉलांत 74 धांवड्यो करून पंगडाक बरे स्थितीत हाडून दवोरलें. रोमन पॉवेलाक (13) शार्दुलान श्रेयस अय्यराकडेन कॅच दिवपाक लायलें. रोमारियो शेफर्डाच्या सांगातान शाय होपान बाकीच्यो ओव्हरी खेळून आपलो शेंकडो पुराय केलो तशेंच पंगडाचो तिट्टी शेंकडोय पुराय केलो. शेफर्ड (15) आनी अकील हुसेन (6) नाबाद उरले. भारताचो फास्ट बॉलर शार्दुल ठाकूरान 53 धांवड्यांत 3 जाल्यार दीपक हुडा, अक्षर पटेल आनी युजवेंद्र चहलान दरेकी एक विकेट घेतली.