भांगरभूंय | प्रतिनिधी
विजय सरदेसायांचो आरोप, विरोधकांची उच्च पांवड्यार चवकशेची मागणी
भांगरभूंय I प्रतिनिधी
पणजी : शहाजहानाचे मानसीकतेक लागून कोट्यांनी रुपयांची तुरदाळ आनी साकर सरकारी गुदावांनी सडून पेड्डेर जाली, अशें म्हणत गोवा फॉरवर्डाचे अध्यक्ष तशेंच आमदार विजय सरदेसाय हांणी मंत्री गोविंद गावडे हांचेर थेट हल्लो केला. जाल्यार ह्या प्रकरणांत जापसालदार आशिल्ल्या मंत्र्याक बेगोबेग निलंबीत करचो अशी मागणी काँग्रेसीन केल्या.
दोन वर्सां नागरी पुरवण खात्याच्या गुदावांनी आशिल्ली कोट्यांनी रुपयांची तुरदाळ आनी साकर पेड्डेर जाल्ल्याच्या मुद्द्यां वयल्यान, विरोधी काँग्रेस, गोवा फॉरवर्ड, आप आनी रिव्हॉल्युशनरी गोवन्स ह्या पक्षांनी सरकाराचेर खर टिका केल्या.
शेनवारा पणजे आयोजीत पत्रकार परिशदेंत पत्रकारांनी आमदार विजय सरदेसाय हांकां हे विशीं विचारले, तेन्ना तांणी सांगलें, कोरोना म्हामारी काळांत सर्वसामान्य गोंयकारांचेर अर्थीक संकश्ट आयिल्लें. सरकारा कडल्यान तांकां गरजेचें धान्य मेळप गरेजेचें आशिल्लें. पूण सरकारान ते तांकां दिनासतना गुदावांत दवरून पेड्डेर केले. शहाजनाची मानसिकता दीन-दुबळ्यांक विसरता. ताका लागुनूच कोट्यांनी रुपयांची तुरदाळ आनी साकर पेड्डेर जाली, अशी टिका तांणी केली.
मुख्यमंत्री डॉ. प्रमोद सावंत हांच्या फुडारपणा खाला भाजप सरकारान सुमार 250 मेट्रीक टन तुरदाळ आनी 10.3 मेट्रीक टन साकरेची नासाडी केली, ही धपको दिवपी गजाल आसा, अशी टिका बायलां काँग्रेसच्यो प्रदेशाध्यक्ष बीना नायक हांणी प्रसिद्द केल्ल्या पत्रकांत केल्या. ह्या गंभीर प्रकाराक जापसालदार आशिल्ले आदले नागरी पुरवण मंत्री आनी अधिकाऱ्यांक बेगोबेग बडतर्फ करचे, तशेंच उच्च न्यायालयाच्या न्यायाधिशांच्या देखरेखी खाला ह्या प्रकरणाची वयल्या पांवड्यार चवकशी जावची, अशी मागणी तांणी केल्या.
कोरोना काळांत तुरदाळीचे दर 200 रुपया कील मेरेन पाविल्ले. ताका लागून सर्वसामान्यांचे हाल जाताले. अशें परिस्थितींत भाजप सरकारान तुरदाळ, साकर गुदावांत दवरून पेड्डेर करप हे दुर्दैवी आसा, अशेंय बीना नायक हिणें म्हणलें.
ताजमहाल, शहाजनाची परतून याद
फाटल्या म्हयन्यांत जाल्ल्या विधानसभा अधिवेशनांत कला अकादमीचे इमारतीचेर चर्चा सुरू आसतना कला आनी संस्कृती मंत्री गोविंद गावडे हांणी शहाजनान कसलीच निविदा जारी करिनासतना ताजमहाल उबारलो. तशेंच फाटलीं जायतीं वर्सां तो जशाक तसो आसा, असो दावो केल्लो. हाचे वयल्यान आमदार विजय सरदेसाय हांणी तांकां बरोच धारेर धरिल्लो. तुरदाळ पेड्डेर जाली त्या वेळार नागरी पुरवण खात्याचे मंत्री गोविंद गावडेच आशिल्ले. हेंच सूत्र धरून सरदेसाय हांणी तांकां शहाजनाची याद करून दिली.
मुख्यमंत्र्यांचो संबंद नासल्यार कारवाय जावये
तुरदाळ प्रकरण चवकशे खातीर सरकारान दक्षता खात्या कडेन सोंपयला. ह्या प्रकरणांत संबंदींत मंत्र्याक जापसालदार थारावन तांचेर कारवाय जावप गरजेचें. मुख्यमंत्री डॉ. प्रमोद सावंत हांचो ह्या प्रकरणांत वैयक्तीक संबंद नासल्यार ते निश्चीत कारवाय करतले, असो विस्वास आमदार विजय सरदेसाय हांणी उक्तायला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
