भांगरभूंय | प्रतिनिधी
भांगरभूंय प्रतिनिधी
पणजी ः कविवर्य शंकर रामाणी जल्मशती सुवाळ्या निमतान ‘शंकर रामाणी हांची कोंकणी कविता’ ह्या पुस्तकाचो लोकार्पण सुवाळो शुक्रारा, 24 जून दिसा सांजवेळा 5 वरांचेर जातलो.
पणजेच्या संस्कृती भवनांतल्या भोवउद्देशी सभाघरांत जातल्या ह्या सुवाळ्याक ज्ञानपीठकार दामोदर मावजो मुखेल सोयरे म्हणून हाजीर रावतले. मानाचे सोयरे म्हणून परेश कामत हांची उपस्थिती आसतली जाल्यार अॅड. उदय भेंब्रे अध्यक्षपद सांबाळटले.
ह्या पुस्तकांत ‘जोगलांचें झाड’, ‘निळें निळें ब्रह्म’, ‘ब्रह्मकमळ’ आनी ‘निरंजन’ ह्या चार काव्यसंग्रहांचो आसपाव आसा. हीं पुस्तकां हाचे आदीं कुळागर प्रकाशन आनी राजहंस वितरण हांणी उजवाडायल्यांत. ह्या पुस्तकांत नामनेचे कवी माधव बोरकार हांची अभ्यासपूर्ण प्रस्तावना आसा. शंकर रामाणी हांच्यो कविता विद्यार्थ्यांक अभ्यासूंक मेळच्यो ह्या हेतून संजना पब्लिकेशन्सान हें पुस्तक उजवाडायलां.
ही कार्यावळ साहित्य अकादेमी, नवी दिल्ली, कला आनी संस्कृती संचालनालय आनी संजना पब्लिकेशन्स, सांगें हांणी आयोजीत केल्या. साहित्यमोगींनी ह्या लोकार्पण कार्यावळीक मुजरत येवन कार्यावळ सोबोवची अशें आवाहन आयोजकांनी केलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
