भांगरभूंय | प्रतिनिधी
डॉ. शाहीन सय्यद हांणी उक्तायलो हुस्कोः म्हापश्यां कोप्टा संबंदांत मार्गदर्शन
भांगरभूंय । प्रतिनिधी
म्हापशें: तंबाकूजन्य पदार्थांच्या व्यसन मुक्तीचे जनजागृती खातीर विवीध उपाय येवजण चालीक लावन लेगीत व्यसनमुक्त जावपी दुयेतींची टक्केवारी फक्त 6 आसा. ही आंकडेवारी हुक्याची आसा. तातूंत सुदारणा हाडचे खातीर सगळ्यांच्या आदाराची गरज आसा, अशें म्हापशें जिल्हो हॉस्पिटलाच्या तंबाकू नियंत्रण कक्षाचे मुखेली डॉ. शाहीन सय्यद हांणी सांगलें.
म्हापशेंच्या पोरण्या आझिलो हॉस्पिटलांत उत्तर गोंयांतल्या सरकारी अधिकाऱ्यां खातीर कोप्टा कायद्या संबंदांत तंबाकूजन्य पदार्थ नियंत्रण प्रशिक्षण कार्यावळींत मार्गदर्शन करतना डॉ. सय्यद उलयताली. जिल्हो पांवड्या वयली समन्वय समितीच्या जोडपालवान ही कार्यशाळा आयोजीत केल्ली. ह्या वेळार गोवा कॅनाचे रोलंड मार्टीन्स तशेंच विवीध खात्यांतले अधिकारी हाजीर आशिल्ले.
व्यसनमुक्ती खातीर सरकारी पांवड्या वयल्यान विवीध उपक्रमा सयत जागृती करतात. उपचाराचेर वखदी रुपांत पयसो खर्च करतात. तली लेगीत फक्त 6 दुयेंती ह्या व्यसनांतल्यान मुक्त जातात जाल्यार उपचार घेवपी परतून व्यसना वटेन वळटात. ही गजाल गंभीर आसा, अशें डॉ. सय्यद हांणी सांगलें.
2016-17 त केल्ल्या सर्वेक्षणा प्रमाण राज्यांतले वट्ट लोकसंख्येच्या 9.7 टक्के लोक तंबाकूच्या व्यसनाचे भकीक पडल्यात. सरासरी पिरायेच्या 17 व्या वर्सा सावन एकाद्या मनशाक व्यसन लागता. शार वाठारा परस गांवगिऱ्या वाठारांत हो प्रकार गंभीर आसा. ते भायर गोंयांत पर्यटक व्हड प्रमाणांत येतात. हांगाच्या मेकळ्या वातावरणाक लागून कायदयाचें बंधन पाळी नासतना तंबाकू संबंदीत पदार्थांचें सेवन करतात. अशा पर्यटकांचेर खर कारवाय करप गरजेचें आसा, अशें डॉ. सय्यद हांणी सांगलें. ह्या वेळार गोवा कॅनचे रॉलंड मार्टीन्स हांणी सांगलें, तंबाकू नियंत्रण कायग्या विशीची म्हायती दिवन ह्या कायद्याची अंमलबजावणी करची. तशें जालें जाल्यारूच तंबाकू व्यसनाचेर गोंय नियंत्रण मेळोवपाक शकता.
व्यसनाचेर सुरवेकूच उपचार करचेः डॉ. सय्यद
म्हापशें जिल्हो हॉस्पिटलांत दर दिसा सरासरी 150 दुयेंती विवीध तरांच्या व्यसनां संबंदांत उपचारा खातीर येतात. तातूंतले 60 टक्के तंबाकू कडेन प्रत्यक्ष जाल्यार 40 टक्के अप्रत्यक्ष परिणाम जाल्ले आसतात. तातूंतले खूबशे जाण गंभीर परिणाम जाले उपरांतूच उपचारा खातीर येतात. व्यसनाचेर सुरवेकूच योग्य उपचार घेतले जाल्यार ते फायद्याचे थारता, अशी म्हायती डॉ. शाहीन सय्यद हांणी दिली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
