भांगरभूंय | प्रतिनिधी
भारताचो अश्टतासांचो खेळगडो वॉशिंग्टन सुंदर कावंटी क्रिकेट सर्तींत पर्जळ्ळो. लॅंकशायरा वतीन खेळटना पयलीं ताणें 5 विकेटी घेतल्यो आनी उपरांत चवथ्या डावांत नाबाद 34 धांवड्यांची खेळी केली. ताच्या ह्या प्रदर्शनाक लागून नॉर्थप्टनशायरा आडचे कावंटी चॅम्पियनशीप मॅचींत लंकाशायराक 4 विकेटींनी जैत मेळोवप शक्य जालें.
ह्या जैता उपरांत लॅंकशायर कावंटी चॅम्पियनशिपीचे पयले डिव्हीजनांत तिसरे सुवातेर पावलो.
कावंटींत पदार्पण करपी सुंदरान पयल्या दोन दिसांनी 76 धांवड्यो दीत 5 विकेटी घेवन प्रतिस्पर्धी पंगडाक 235 धांवड्यांचेर आडावपाक हातभार लायलो. पूण धांवड्यांचो फाटलाव करपी लॅंकशायराक फक्त 132 धांवड्यो करप शक्य जाल्यो. सुंदर सवे सुवातेर बॅटींग करतना फक्त 2 धांवड्यो केल्यो.
दुसऱ्या डावांत लॅंकशायराच्या फास्ट बॉलरांनी नॉर्थप्टनशायराचो डाव 174चेर सोंपयलो. ते उपरांत मोखीचो फाटलाव करतना जॉश बोहैननान तिसरे सुवातेर बॅटींग करतना 103 धांवड्याची खेळी केली. पूण, 165चेर लॅंकशायरान चार विकेटी फक्त 44 धांवड्यां भितर वगडायल्यो.
अशे कठीण परिस्थितींत सुंदरान वील विलियम्सा वांगडा मेळून 26.4 ओव्हरींनी 69 धांवड्यांची नाबाद भागिदारी करून जैत मेळोवन दिलें. सुंदरान 81 बॉलांनी पांच चवक्यांचे मजतीन नाबाद 34 धांवड्यो केल्यो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
