भांगरभूंय | प्रतिनिधी
पत्रभूंय
डाॅ. प्रमोद सावंत
मानादिक मुख्यमंत्री,
नमस्कार.
गोवा मेडिकल काॅलेज हाॅस्पिटलांत बरी सेवा समेस्तांक मेळची हे खातीर दोतोरांचे आंदोलन पालोवपाचे येत्न सरकारान केले. वेळार सादूर जावन मनशाची जीण वाटावप म्हत्वाचें. आंदोलन खर जाल्लें जाल्यार भौशीक मालमत्तेचेंय लुकसाण जावपाचें. जनतेच्यो तुमचे कडल्यान व्हड अपेक्षा आसात त्यो पुराय करतले अशी आस्त आसा.
गोवा मेडिकल काॅलेज आनी हाॅस्पिटल, आरोग्य सेवा संचालनालय हांकां एकठांय हाडपाची गरज आसा. कांय राज्यांनी आरोग्य (भलायकी) शिक्षण संचालनालय आसा तशें गोंयांतय जावपाक जाय. भलायकीच्या मळार राज्य उदरगतीचे नवे वाटेन वतना अॅलोपथीक बळगें दिवपी होमिओपथी, आयुर्वेद, नॅचरोपथीक तेंको मेळ्ळा. गोवा मेडिकल काॅलेज, हाॅस्पिटलांतल्यो सेवा बळिश्ट करपाक जाय. वैजकी काॅलेजींत आधुनिकता, तंत्रगिन्यान आयलां तेच तांकीचें, सेवा दिवपी मनीसबळ तयार जालां? कन्सलटंट कितले आसात? नवें वैजकी काॅलेज जाय, मेडिकलांत शिक्षणाचे जागे वाडप, नव्यो पोस्ट ग्रॅज्युएट शिक्षण हाडप गरजेचें. जीएमसी बिल्डेंगची परतून थंयच बांदावळ करप शक्य आसा? सरकाराची लागसार आशिल्ले भुंयेचो उपेग करुंक येता? नामना जोडिल्ल्या गोमेकाॅतल्या आदल्या विद्यार्थ्यांक, सध्याच्या वरिश्ठ दोतोरांक विश्वासांत घेवन नवी बिल्डिंग खंय, कशी जावची ताचो निर्णय घेयात. कांपाल पणजे वाठारांत आशिल्ल्या आरोग्य खात्याचे इमारतींत एकदां वचून पळोवचें. इमारत जाण्टी जाल्या, दोतोर प्रमोशनाची वाट पळयतात.
सरकारांत भौशीक आरोग्य (भलायकी) सेवा, म्हाविद्यालय म्हत्वाचीं आसतात. भलायकी सेवा दिवपी केंद्रा गांवामेरेन बांदल्यांत, बरी सेवा दिवपी दोतोर आसात? उत्तर आनी दक्षिण गोंयचीं मडगांव, म्हापशेंची हाॅस्पिटलां सुदारपाचो वावर सरकार करता. दक्षीण गोंयांत नवें वैजकी म्हाविद्यालय जावचें, वैजकी शिक्षण प्रवेश तंत्रीक शिक्षण संचालनालयातल्यान वेगळावंपा पासत येत्न करचे.
प्रत्येक आवय, बापायक आपलें भुरगें दोतोर, इंजिनियर जावचें अशें दिसता. इंजिनियरिंगा परस वैजकी सेवेंत येवपाक गोंयचे विद्यार्थी सोदतात हाची जाणवीकाय तुमकां आसा. कुशळताय उदरगत शिक्षणाक नवी दिका दाखोवपाक गोंय नेटान फुडें वता. बारीकसाणेन वैजकी शिक्षण, अभ्यासक्रमाचो नियाळ करतले, बदल हाडटले असो विश्वास आसा.
बरें मागून
सुहासिनी प्रभुगांवकार.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
