भांगरभूंय | प्रतिनिधी
पणजीः वैजकी सेवा दिवपी राज्य कर्मचाऱ्यां आड जावपी हिंसाचार वा वैजकी संस्थांच्या मालमत्तेचें लुकसाण जावपा विशीं कागाळी सुटावे करपा खातीर उत्तर आनी दक्षीण गोंय जिल्लो दंडाधिकाऱ्यांच्या अध्यक्षते खाला समित्यो तयार केल्यात.
उत्तर गोंय समितींत गृह खात्याचे अवर सचीव 1 आनी 2, भौशीक अभियोग संचालक, भलायकी संचालक, गोमॅकाॅचे वैजकी अधीक्षक, उत्तर गोंय जिल्हो हॉस्पिटलाचे उपसंचालक हांचो आस्पाव जाता. दक्षीण गोंय जिल्लो समितींत गृह खात्याचे अवर सचीव 1 आनी 2, भौशीक अभियोग संचालक, भलायकी संचालक, गोमॅकॉचे वैजकी अधिक्षक, दक्षीण गोंय जिल्हो हॉस्पिटलाचे उपसंचालक हांचो आस्पाव जाता. हे विशीं गृह खात्याचे अवर सचीव पूजा मडकयकार हांणी आदेश जारी केला.
मजगतीं फाटल्या कांय वर्सांत राज्यांतल्या वेगवेगळ्या हॉस्पिटलांनी दोतोर आनी हेर वैजकी कर्मचाऱ्यांचेर हल्लो करपाचे यत्न दुयेंतीच्या नात्यांतल्या लोकांनी सुरू जाल्यात. राज्य सरकारानय अशी घडणूक घडची न्हय हे खातीर खर उपाय केल्यात. फुडाराक अशी घडणूक घडल्यार कागाळी सुटावी करपा खातीर आतां सरकारान दोनूय जिल्ह्यांनी दोन समित्यो तयार केल्यात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
