भांगरभूंय | प्रतिनिधी
भुपृष्ठ येरादारी मंत्रालयाच्या तज्ञांचो न्हयकार
मडगाव, प्रतिनिधी: वेस्टर्न बायपासाचेर बाणावले रस्तो स्टिल्टाचेर करपाची मागणी सध्या नागरीक करतात. तशेंच केंद्रीय भुपृष्ठ येरादारी मंत्रालयाच्या तज्ञांनी केल्ले पळोवणी उपरांत दिल्ल्या अहवालांत स्टिल्ट पुलाची गरज नाशिल्ल्याचें मत तांणी उक्तायलां. साळ न्हंयेच्या पात्रांतलो चिखल उसपल्यार आनी उदकाच्यो वाटो मेकळ्यो दवरल्यार हुंवार येवपाची शक्यताय आसा, अशें मत तज्ञांनी उक्तायलां.
केंद्रीय येरादारी मंत्रालयांतले तज्ञ आर. के. पांडे हांणी बाणावले, तळेबांद वाठारांत सांठून दवरपी उदकाची पळोवणी पावसांत केल्ली. तेन्ना तांणी उदक वचपा खातीर योग्य वेवस्था केल्यार स्टिल्टची गरज ना, अशें म्हणिल्लें. अहवालांत साळ न्हंयच्या पात्रांतलो सांठून उरिल्लो गाळ काडप, पात्रांत सांठून उरिल्लो गाळ काडप, न्हंयेचें पात्र खोल करप, उदक सांठून उरिल्ल्या भागांतल्यान उदक सरळ न्हंयेंत वचपा खातीर व्हाळांचो आंकडो वाडोवप, पुलांची उंचाय आनी लांबाय वाडोवपाची वेवस्था करपाची सुचवणी अहवालांत केल्या. बाणावले वाठारांत उदक सांठयिल्ल्यान हुंवाराची परिस्थिती निर्माण जाता. हें उदक वचपा खातीर योग्य उपाय केल्यार कसलेच तरेचो धोको जाणवचो ना, अशें तज्ञांनी सांगलां.
केंद्रीय समितीचे तज्ञ आर. के. पांडे हांणी केल्ल्या सुचवण्यां प्रमाण भौशीक बांदकाम विभागाच्या राष्ट्रीय महामार्ग विभागा कडल्यान उदकास्रोत खात्याक गरजेच्या गजालींचेर कार्यवाय करपाक सांगल्या. तळेबांद तळ्याच्या वाठारा सयत हेर भागांतलें उदक साळ न्हंयत वचपाक व्हाळांची आनी उदक व्हांवून वचपाक गटारांची वेवस्था करपाच्यो सुचवण्यो केल्यात.
बाणावले वेस्टर्न बायपास हो स्टिल्टचेर जावपी मागणे खातीर लोकांचे मागणे उपरांत राज्यांतल्या फुडार्यांनी केंद्रीय मंत्री नितीन गडकरी हांची भेट घेतली. उपरांत गडकरी हांणी आर. के. पांडे हांणी पळोवणी करपा खातीर धाडिल्ले. तांणी पळोवणी करून अहवाल सादर केला.
अहवाला प्रमाण सांठून उरपी उदक न्हंयत वचपाची वेवस्था केल्यार स्टिल्टची गरज ना अशें अहवालांत म्हणलां.
आमदार विजय सरदेसाय हांणी,बाणावले स्टिल्ट बांधकामा खातीर केंद्रीय मंत्री नितीन गडकरी हे सकारात्मक आशिल्ले. पूण, विरोधकांक हाचें श्रेय मेळटलें ह्या भंयान हाचे मदीं राजकारण हाडलें. पूण स्टिल्ट पुलाच्या मागणे खातीर लोकां वांगडा रावतलों अशेंय तांणी स्पश्ट केलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
