भांगरभूंय | प्रतिनिधी
भांगरभूंय । प्रतिनिधी
वाळपयः सत्तरी तालुक्यांल्या वेळूस – हेदोडे मजगतींचो अशीर पूल सध्या कमकुवत जाल्ल्यान केन्नाच मोडून पडपाची शक्यताय आसा. हे पुलाचे सुवातेर नवो रूंद पूल बांदपा खातीर वाळपयचो आमदार आनी भलायकी मंत्री विश्वजीत राणे हांणी यत्न करचो अशी थळाव्या लोकांची मागणी आसा. वाळपय पालिका वाठारांतल्या वेळूस आनी नगरगांव पंचायत वाठारांतल्या हेदोडे हाचे मजगतीं कांय वर्सां आदी हो पूल बांदल्लो.
ह्या पुला वयल्यान फकत दुचाकी वाहनां व्हरपाक मेळटात. चारचाकी वाहनां व्हरपाक मेळनात देखून हेदोडे वाठारांतल्या लोकांक चड अंतर कापून वाळपय येवचें पडटा. रूंद पूल बांदल्याल लोकांक ताचो बरो फायदो जातलो. रूंद पूल बांदल्यार विद्यार्थ्यांक वाळपय वाठारांतल्या शिक्षणीक संस्थांत वचपाक ताचो बरो उपेग जातलो. हेदोडे वाठाराचे उदरगती खातीर हो पूल कामाक येवपाक शकतलो अशें हेदोडेच्या दत्ताराम बर्वे हांणी सांगलें.
सध्याच्या पुलाक वेरो पडल्यात. कमकुवत जाल्ल्यान पुलावयल्यान चलत वतना आवाज येता ताका लागून ताचे वयल्यान दुचाकी व्हरपाक भिरांत दिसता, अशें थळावो नगरसेवक रामदास शिरोडकार हांणी सांगलें. रूंद पूल बांदपाचो प्रस्ताव आपणे बांदकाम खात्याक सादर केला. विश्वजीत राणे हांणी लक्ष घातल्यार पूल जावपाक शकतलो अशें तांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
