भांगरभूंय | प्रतिनिधी
दर्यादेगेर जेटी बांदूंक शकतात; थळाव्यांनी उक्तायलो दुबाव
वास्को: दांडो वेळसांव दर्यादेगेर मंगळारा दनपारां सर्वेक्षणा खातीर आयिल्ल्या पर्यटन विभागाच्या अधिकाऱ्यांक थळाव्या नागरिकांचे तिडकीक तोंड दिवचें पडलें. ताका लागून तांकां सर्वेक्षणाचें काम थांबोवचें पडलें. थंय कसलें सर्वेक्षण करतात हे विशीं आमकां वा ग्रामपंचायतीक कसलीच म्हायती दिवंक नाशिल्ल्याचो दावो थळाव्यांनी केला.
दांडो वेळसांव दर्यादेगेचे शिमे संबंदी सर्वेक्षण करपा खातीर आयिल्ल्याचो दावो विभागाच्या संबंदितांनी केलो. पूण थंय कोळसो देंवोवपा खातीर जेटी बांदूंक शकतात असो दुबाव थळाव्यांनी उक्तायलो. तांणी थंय एकठांय जावन विरोध सुरू केलो.
ह्या प्रकरणाची वेर्णें पुलिसांक म्हायती मेळटकूच पुलीस घडणूक थळार पावले. ह्या सर्वेक्षणा संबंदी कुठ्ठाळीचे आमदार अँथनी वाझ हांकां म्हायती दिल्ली अशें संबंदीत अधिकाऱ्यान थळाव्यांक सांगलें. पूण आमदारान आमकां कांयच कळोवंक नाशिल्ल्याचो दावो थळाव्यांनी केलो.
वेळसांवचे पंच वांगडी फ्रान्सीस ब्रागांझा हांणी सांगलें, पर्यटन विभागाचे अधिकारी ह्या सर्वेक्षणा संबंदी योग्य कागदपत्रां दिवंक शकले नात. ताका लागून ग्रामस्थांनी विरोध केल्ल्यान तें सर्वेक्षण आडायलें. संबंदीत अधिकाऱ्यांनी वैध कागदपत्रां, योग्य मंजुरी आनी पंचायतीक योग्य म्हायती दिले बगर आमी सर्वेक्षणाक परवानगी दिवचे नात. कायदेशीर कागदपत्रां सादर केले उपरांतूच आमी थंय सर्वेक्षणा खातीर परवानगी दिवं.
ह्या प्रकरणांत समाजीक कार्यकर्ते ओलंसियो सिमोयश हांणी दखल घेतना हें सर्वेक्षण करचें पयलीं योग्य कागदपत्रां सादर करपाची तशेंच पंचायतीक म्हायती दिवपाची गरज आशिल्ल्याचें सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
