भांगरभूंय | प्रतिनिधी
म्हापशें: वेर्लें-काणका पंचायत वाठारांत खोर्ली-वेर्लें शिमेर साईबाबा देवळा कुशीच्या रस्त्यार व्हड प्रमाणांत कोयर उडयला. ह्या कोयराचे घाणीक लागून लोकां मदीं व्हड समस्या निर्माण जाल्या.
हो रस्तो कोयर उडोवपाचें थळ जालां. वेर्लें-काणका पंचायत व्हड प्रमाणांत कोयर वेवस्थापना खातीर निधी वापरता. तशेंच गांवांतलो कोयर एकठांय करून घन कोयर प्रकल्पांत धाडून दितात. तरी लेगीत ह्या रस्त्या वयलो कोयर उबारी नाशिल्ल्यान लोकांनी निरशेणी उक्तायल्या.
हे सुवातेर पंचायतीन कोयर उडोवप्यां आड पांच हजारांचो दंड दितले असो सुचोवणी तकटो उबारला. तरी लेगीत कोयर उडोवपाचें कांय बंद जायना.
वेर्लेंच्या लोकांची ह्या रस्त्या वयल्यान व्हड प्रमाणांत येरादारी आसता. जाल्यार ह्या कोयराचेर रस्ताद सुणीं आनी हेडगीं गोरवां तो खावपा खातीर गर्दी करतात. सकाळच्या आनी दनपारच्या वेळार शाळेंतली भुरगीं तशेंच बायलां ह्या रस्त्याचो वापर करतात. तशेंच सांजवेळा लोक साईबाबा देवळांत वतात. ह्या लोकांच्या आंगार सुणीं धांवून येतात. खूबशा जाणांक सुण्यांनी घांसूय मारला. तरी लेगीत पंचायतीन ह्या कोयरा विशीं गरजेची ती उपाय येवजण केल्ली ना.
ह्या रस्त्यार कांय बेजापसालदार लोक कोयर उडयतात. ताका लागून ही सुवात कोयर थळ जाल्ल्यान रस्त्यार घाणीचें साम्राज्य पातळ्ळां. कोयर वेळारूच उबारूंक नाशिल्ल्यान लोकांक हाचो त्रास जाता अशें आदले पंच वांगडी बाळा नायक हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
