भांगरभूंय | प्रतिनिधी
भांगरभूंय । प्रतिनिधी
सावयवेरें : वेरें- वाघुर्मेचे ग्रामसभेंत आदीं दिल्ल्या लेखी प्रस्नांच्यो योग्य जापो सरपंच शोभा पेरणी दिवपाक शकली ना. ताका लागून आयतारा आयोजीत केल्ली ग्रामसभा अर्द्यारूच तहकूब केली आनी ती फुडल्या आयतारा घेवपाचें थारायलें. वेरें- वाघुर्मेच्या इतिहासांत पयलेच खेपे ग्रामसभा तहकूब केल्या. तशेंच हे ग्रामसभेंत थळाव्या लोकांनी सरपंचाचेर निश्क्रीय आशिल्ल्याचो आरोप करून तांच्या राजिनाम्याचीय मागणी केल्या.
वेरे- वाघुर्मेची ग्रामसभा सकाळीं 10.30 वरांचेर सुरू जाल्ली. हे ग्रामसभेंत पयलींच वट्ट 35 प्रस्न लोकांनी लेखी निवेदना वरवीं दिल्ले. तातूंतल्या फक्त 10 प्रस्नांचेर दनपारां 1.45 वरां मेरेन चर्चा जावन लोकांच्या एकाय प्रस्नाची जाप पंचायत मंडळ योग्य तरेन दिवपाक शकलें ना. अखेरेक ती ग्रामसभा तहकूब करपाचो थाराव घेतलो आनी तो संमत केलो.
लोकांनी दिल्ल्या सगळ्या लेखी प्रस्नांचो सारको अभ्यास करुनूच ताच्यो फावोश्यो जापो दिवपा खातीर आयतारा परतून ग्रामसभा घेवपाची मागणी केली. हे ग्रामसभेक सुरवेकूच लोकांनी व्हड संख्येन हाजेरी लायिल्ली. लोकांनी विचारिल्ल्या प्रस्नांक योग्य जापो दिवपाक पंचायत मंडळ अपेशी थारिल्ल्यान लोकांनी नाराजी उक्तायली तशेंच कांय लोकांनी घरची वाट धरली.
ग्रामसभे वेळार माचयेर सरपंच शोभा पेरणी, उपसरपंच बाबू गावडे, पंच स्वाती पालकार, लोचन नायक, नवनाथ वेलकासकार, अक्षय नायक, रोहन तारी, सचीव प्रसाद नायक, निरिक्षक संजय नायक, कुर्टी जिल्हो पंचायत वांगडी प्रिया च्यारी उपस्थीत आशिल्ली.
सरपंच पेरणी हांणी येवकार दिलो. सचीव नायक हांणी फाटले ग्रामसभेचो अहवाल आनी जमा- खर्च सादर केलो. ह्या वेळार कुर्टी जिल्हो पंचायत वांगडी च्यारी हांच्या फुडारपणान वेरें- वाघुर्मे पंचायत वाठारांत डेंग्यूचो प्रसार जावचो न्हय, हे खातीर वखदां मारपाची वेवस्था केल्ले खातीर च्यारी हांकां परबीं दिलीं.
फाटले ग्रामसभेच्या अहवालांत विचारिल्ल्या कांय प्रस्नांच्यो जापो सचिवान दिनासतना ती सरपंच वा पंच वांगड्यांनी दिवची, अशी मागणी लोकांनी केली. फाटले ग्रामसभेंत घेतिल्ल्या अहवालांतल्या प्रस्नांचेर खूब वेळ चर्चा जाली. चर्चे उपरांत कांय प्रस्नांच्यो योग्य जापो मेळूंक नाशिल्ल्यान आनी ताचेर पंचायतीन मातूय फाटपुरवण करूंक नाशिल्ल्यान ग्रामसभेंत इल्लो बोवाळ लेगीत जालो.
ते उपरांत लोकांनी आदींच लेखी निवेदना वरवीं मांडिल्ले प्रस्न ग्रामसभेंत घेतले. तातूंत पंचायत मैदानाचेर काँक्रिटाची क्रिकेट पीच उबारप, गांवा भायले कितले लोक गांवांत येवन रावल्यात, ग्रामपंचायत वाठारांत बोअरवॅल कितल्यो आसात, उदकाच्यो टांकयो तशेंच भौवउद्देशी खेळां संकुला विशीं विचारिल्ल्या प्रस्नांच्यो जापो योग्य तरेन पंचायत मंडळाक दिवपाक जाल्यो ना. ताका लागून अखेर लोकांनी आक्रमक भुमिका घेवन पंचायत मंडळ निश्क्रीय आशिल्ल्याचो आरोप केलो. ग्रामसभेक खूब वेळ जाल्ल्यान उरिल्ले 25 प्रस्न फुडले ग्रामसभेंत घेवचे आनी ही ग्रामसभा तहकूब करची. तशेंच फुडले ग्रामसभेंत पंचायत मंडळान सगळ्या प्रस्नांचेर वेवस्थीत अभ्यास करून येवचो, अशी लोकांनी नेटाची मागणी केली. ते प्रमाण ग्रामसभा तहकूब केली आनी फुडली ग्रामसभा येता त्या आयतारा घेतले, अशें सरपंचान सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
