भांगरभूंय | प्रतिनिधी
मुरगांवचे नगराध्यक्ष लिओ रॉड्रिगीश हांची शिटकावणी
वास्को: जांणी वेपारी परवानो कर भरलो ना तांणी तो ताकतिकेन भरचो. नाजाल्यार तांचे आड खर कारवाय करतले अशी शिटकावणी मुरगांवचे नगराध्यक्ष लिओ रॉड्रिगीश हांणी दिल्या. तशेंच जांणी आपली दुकानां भाड्यान दिल्यात तांचे आडूय खर कारवाय करतले अशेंय तांणी म्हणलें.
मुरगांव पालिकेन सद्या थकबाकी वसूल करपा खातीर मोहीम उगडल्या. पंचायत मंत्री मॉवीन गुदिन्हो हांणी लेगीत एके कार्यावळींत मुरगांव पालिकेन थकबाकी वसूल करपा खातीर मोहीम हातांत घेवची अशें आवाहन केल्लें. ते फाटभुंयेर नगराध्यक्ष रॉड्रिगीश हांणी पालिका निरिक्षक आनी हेर कर्मचारी हांचे सयत काल (बुधवारा) सकाळीं मुरगांव पालिका मार्केटांत भोंवडी केली. तांणी थंयच्या विक्रेत्यांच्या वेपारी परवान्यांची तपासणी केली, तेन्ना कांय जाणांनी परवानो शुल्क भरून नुतनीकरण केल्ल्याचें जाल्यार कांय जाणांनी अजून नुतनीकरण करूंक नाशिल्ल्याचें दिसून आयलें. तांणी संबंदितांक परवानो शुल्क भरपाची सुचोवणी केल्या.
ह्या मार्केटांत खूबशा जाणांनी आपलीं दुकानां भाड्यान दिल्यांत. ते संबंदी पालिके कडेन कसलीच नोंद ना. तशेंच कांय जाणांच्या बापायच्या नांवार आशिल्लो परवानो अजून संबंदीत वारसदारांनी आपल्या नांवार हस्तांतरीत करूंक नाशिल्ल्याचें दिसून आयलां. संबंदितांनी तो रोखड्या रोखडो आपल्या नांवार हस्तांतरीत करचो अशें आवाहन तांणी केलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
