भांगरभूंय | प्रतिनिधी
भांगरभूंय । प्रतिनिधी
म्हापशेंः म्हापशें, पेडणे, पोरणे गोंय आनी हणजूण वाठारांतल्या स जाणांक वेगवेगळीं हांयसा दाखोवन 9.9 लाखांक टोपी घालपाचे प्रकार जाल्यात. ते संबंदी त्या वाठारांतल्या पुलीस स्टेशनांनी गुन्यांव नोंद केल्यात.
एसबीआयची डेबीट कार्ड सेवा डिअॅक्टिव्ह करतां अशें सांगून खोर्ली-म्हापशें हांगचे एके बायलेच्या बँक खात्यांतल्यान 2 लाख 64 हजार 887 रुपये काडले. श्रुती गाड हिणे म्हापशें पुलिसांत केल्ले कागाळेंत दीपक कुमार नावाचे व्यक्ती आड फटवणूक केल्ल्याचो गुन्यांव दाखल केला. 40 लाखांची लॉटरी लागिल्ल्याचे सांगून भाटीवाडो-पर्रा हांगच्या सेड्रिक डायस हांका 3.45 लाख रुपयांक फटयलें. विनोद कुमार, राम आनी सिद्धार्थ हांणी डायस हाचे कडेन मोबायला वयल्यान संपर्क सादलो आनी ताका लॉटरी लागिल्ल्याचें सांगलें. लॉटरीचे पयशे मेळपा खातीर तांच्या खात्यांत पयशे जमा करपाक सांगले. आपली फटवणूक जाल्या हें कळटकूच डायसान पुलिसांत कागाळ केली.
झूम मिटींग वरवी इश्टागत करून मुंबयच्या संदीप शिवाजी देशमुख हाणे बिझनेस करया अशें सांगून कांता जेना हाका ताच्या खात्यांत 1.85 लाख रुपये जमा करपाक सांगले. उपरांत देशमुखान ते काडले. ताचे आड गुन्यांव नोंद केला. मुंबयच्या विमानतळाचेर निकॉल ह्या तुज्या इश्टाक मनी लाँडरींग प्रकरणात अटक केल्या, ताका सोडपाक जाय जाल्यार सान्ताक्रुजच्या राजीव कुमार हाका जयपूर- राजस्थानच्या रुप्रेश आनी सोनिया सिंग हांणी तांच्या खात्यांत 69,900 रुपये जमा करपाक सांगलें. आपली फटवणूक जाल्लें हें कळटकूच कुमार हाणे पोरणे गोंय पुलिसांत कागाळ केली.
ट्रेड मार्क अधिकारी आसा अशें सागून चड कळंतर दिवपाचें उतर दिवन शिवोले हांगच्या रुपम मुथ्रेजा हाका अनवळखी लोकांनी 1 लाख रुपयांक फटयलें. तांणी व्हॉटस्एपाचेर ताचे कडेन संपर्क सादून ही फटवणूक केली. हणजूण पुलिसांनी अनवळखी लोकां आड गुन्यांव नोंद केला. अॅमेझोनाचे कर्मचारी आशिल्ल्याचे सांगून आश्वें- मांद्रे हागच्या सिल्वर व्हेव हॉटेलांतल्या दोन टीव्हींचेर शिक्के मारपाच्या निमतान हॉटेल धनयाक 28,300 रुपयांक तोपी घालपाचो प्रकार जालो. ह्या प्रकरणात अंकुश श्रीवासत्व हांणी केल्ले कागाळे वयल्यान पेडणे पुलिसांनी तरनीत सिंग जॉली आनी रोशनी जॉली (पुणे) ह्या जोडप्या आड फटवणुकेचो गुन्यांव नोंद केला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
