भांगरभूंय | प्रतिनिधी
सरकाराचो निर्णय; जिल्होधिकाऱ्यांनी मागयली बीएलओंची वळेरी
पणजीः प्राथमीक शाळांतल्या शिक्षकांक वेंचणुकांच्या कामांतल्यान वगळून विद्यार्थ्यांक दर्जेदार शिक्षण दिवपा विशींच्या हालचालींक सरकारान वेग दिला. ताचोच भाग म्हूण जिल्होधिकाऱ्यांनी वेंचणुकेच्या कामा पसून नेमणूक जावपी शिक्षकांची वळेरी मागयल्या. तांचे सुवातेर हेर कर्मचाऱ्यांची नेमणूक करपाचीय तयारी सुरू केल्या, अशी म्हायती सरकारी सुत्रां कडल्यान मेळ्ळ्या.
विद्यार्थ्यांची पटसंख्या उणी आशिल्ल्या शाळांचे हेर शाळांनी विलिनीकरण करपा विशीं सरकारान शिक्षक, पालकां कडेन चर्चा सुरू केले उपरांत ह्या विशया वयल्यान राज्यभरांत खवदळ पडिल्लो. खाजगी शाळां खातीर सरकारी प्राथमीक शाळां बंद करपाचो डाव सरकारान आंखिल्ल्याचो आरोप करीत विरोधी पक्षांनीय सरकाराचेर टिका केल्ली. विलिनीकरणाच्या नांवा खाला प्राथमीक शाळां बंद करच्यो न्हय, अशी मागणी करीत कांय वाठारांतल्या पालकांनी हे विशींचे निवेदन शिक्षण खात्याक सादर केल्ले.
हो विशय घुमसत आसतनाच भोवतेक शाळांतल्या शिक्षकांचो वापर सरकारा वेंचणुकांच्या कामां करतात. ह्या कामांत तांचे आठ ते णव म्हयने वतात. फक्त दोन ते तीन महिनेच हे शिक्षक शाळेंत वचून विद्यादानाचें काम करतात. ताका लागून प्राथमीक शाळांतल्या शिक्षणाचो दर्जो घसरत चल्ला. ते भायर ह्या कारणांक लागून जायते पालक आपल्या भुरग्यांक सरकारी शाळांतल्यान काडून खाजगी शाळांनी घालतात, अशो प्रतिक्रिया ग्रामीण वाठारांतल्या पालकांनी मुख्यमंत्री डॉ. प्रमोद सावंत हांचे कडेन उलोवन दाखयिल्ली. ताका लागुनूच मुख्यमंत्र्यान हाचे मुखार प्राथमीक शाळांतल्या शिक्षकांची नेमणूक बीएलओ म्हूण करपाची न्हय, तशेंच तांचे वरवीं विद्यार्थ्यांक दर्जेदार शिक्षण दिवन सर्वांगी उदरगत करपाचो निश्चेव केला. हे फाटभुंयेर मुख्यमंत्र्यान दोनूय जिल्होधिकाऱ्यांक वेंचणुकां खातीर बीएलअो म्हूण नेमणूक जावपी शिक्षकांची वळेरी तयार करपाचे निर्देश दिल्यात, अशें सुत्रांनी सांगलें.
शिक्षण खात्या कडल्यान जिल्होधिकाऱ्यांक प्रस्ताव
कांय म्हयन्यां पयलीं एके कार्यावळींत उलयतना मुख्यमंत्री डॉ. प्रमोद सावंत हांणी प्राथमीक शिक्षकांक वेंचणुकांचें काम दिवचे नात, अशें स्पश्ट केल्ले. ते विशींचो प्रस्ताव शिक्षण खात्यान बेगोबेग जिल्होधिकाऱ्यांक धाडचो अशें निर्देश तांणी दिल्लें. ते प्रमाण शिक्षण खात्यान तीन म्हयन्यां पयलीं तसो प्रस्ताव दोनूय जिल्होधिकाऱ्यांक धाडला, अशी म्हायती शिक्षण संचालक शैलेश झिंगडे हांणी दिली
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
