भांगरभूंय | प्रतिनिधी
आग्रा, खबरां संस्था: वृंदावनांतलें बांके बिहारी देवूळ हे भारतांतल्या लोकप्रीय तीर्थथळांतलें एक. हांगा खास करून उत्तर प्रदेशांतल्या भक्तांची सदांच गर्दी आसता. पहलगाम आतंकवादी हल्ल्याचो निशेध करपी कांय हिंदुत्ववादी संघटनांनी ह्या देवळाक सेवा दिवपी आनी हांगा दुकानां आशिल्ल्या मुस्लिमाचेर पूर्ण बहिश्कार घालचो अशी सुचोवणी केल्ली, ती पुजारी आनी देवस्थान समितीन न्हयकारल्या.
मथुरा आनी वृंदावनांतल्या कांय हिंदुत्ववादी संघटनांच्या गटान हिंदू दुकानदारांक आनी यात्रेकरुंक ‘अल्पसंख्यांक समाजा कडेन वेपार करचो न्हय’ अशें सांगलां. मुस्लिम दुकानदारांनी ‘वेवसायीक आस्थापनांचेर धनयाचीं नांवां बरोवचीं’ अशेंय ह्या गटान सांगलां.
बांके बिहारी देवळाच्या वेव्हारांतल्यान मुसलमानांक कुशीक काडपाची मागणी करपी काशी विद्वत परिशद हे संस्थेचे वांगडी नागेंद्र महाराज हांणी सांगलें, ‘तांणी चलयल्लीं दुकानां आमी सोदल्यांत. दुकानांचेर तांकां तांचीं नांवां बरोवपाक सांगलां आनी हिंदू दुकानदारांक तांचे वांगडा काम करचें न्हय आनी त्या समाजांतल्या लोकांक कसलेंच काम दिवचें न्हय अशेंय सांगलां’.
शेंकड्यांनी वर्सांचो एकचार
ह्या आवाहनाचेर प्रतिक्रिया दितना बांके बिहारी देवळाचे पुजारी आनी देवळाच्या प्रशासन समितीचे वांगडी ज्ञानेंद्र किशोर गोस्वामी हांणी सांगलें, ‘हें वेव्हारीक न्हय. मुसलमानांचें, खास करून कारागीर आनी विणकारांचें ह्या देवळा कडेन आनी भक्तां कडेन खोलाये मेरेन संबंद आसात. शेंकड्यांनी वर्सां सावन बांके बिहारीचो भेस तेच विणतात. तातूंतल्या जायत्या मुस्लिमांची बाकें बिहारीचेर श्रद्धा, भक्ती आसा. ते नेमान देवळाक भेट दिवन दर्शनूय घेतात. वृंदावनांत देवाक पुजे वेळार घालतात तातूंतले कांय मुकुट आनी कांकणांय फाटलीं कितलींशींच वर्सां तेच (मुसलमान) तयार करतात.’
चडशे भटजी आनी थळाव्या लोकांनी गोस्वामी सांगतात, ताचे कडेन सहमती दाखयली.
गोस्वामीन म्हणलें: “हय, त्या आतंकवाद्यांक (पहलगामांत हल्लो करपी) खरांतली खर ख्यास्त दिवची. आमी पुरायपणान सरकारा वांगडा आसात. पूण वृंदावनांत हिंदू आनी मुसलमान शांततायेन आनी एकचारान रावतात, हें आमी विसरूंक शकनात’
देवळा पासून लागींच ‘स्टार मुकुट’ नांवान दुकान चलोवपी जावेद अली हाका हिंदुत्ववादी गटान थंयच्यान भायर सरपाक सांगलां. जावेदान सांगलें, पुजाऱ्यांचे भुमिकेन आमकां गरज आशिल्ली थाकाय, मजत मेळ्ळ्या. निदर्शकांनी म्हज्या दुकानांत येवन सायनबोर्डाचेर मालकाचें नांव घालपाक सांगलें. हांव हें दुकान 20 वर्सां वयर चलयतां. म्हजो बापूय हांगा टेलर म्हणून काम करतालो. जेन्ना जेन्ना गिरायक हांगाच्यान वस्तू घेता तेन्ना हांव चड करून तांकां म्हजें नांव आनी मोबायल नंबर छापिल्ल्या बिलाची पावती दितां. अजून तरी कोणें पावतेचेर म्हजें नांव पळोवन नाका म्हणूंकना. आमकां लिपोवपा सारकें हांगा कांयच ना, अशेंय जावेद अलीन सांगलें.
अलीच्या दुकाना कुशीक आशिल्ल्या निखिल अग्रवाल हांणी सांगलें, आमकां इतलीं वर्सां एकमेकांचो वा लोकांचो केन्नाच कसलोच त्रास जावंक ना. हांव आनी जावेद एकामेकांक आदार दितात.
ह्या प्रकरणांत अजून औपचारीक कागाळ मेळूंक ना. ती मेळत जाल्यार आमी खर कारवाय करतले, अशें थळाव्या पुलिसांनी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
