भांगरभूंय | प्रतिनिधी
काँग्रेस फुडाऱ्यांनी घेतली मुखेल वीज अभियंत्यांची भेट
पणजी, प्रतिनिधी : वाडीव वीज बिलांचेर तोडगो काडून लोकांक थाकाय दिवपी एजंट वीज खात्यातूय आसात, असो आरोप काँग्रेस फुडाऱ्यांनी केला. मुखेल वीज अभियंते स्टीफन फर्नांडिस हांची भेट घेवन हाचेर उपाय काडपाची मागणी काँग्रेस फुडारी एल्विस गोम्स हांणी केली.
साश्ट म्हालांत बऱ्याच लोकांक चड बील आयलां. विजेच्या वापरा परस चड बिल आयिल्ल्यान लोकांनी मडगाव वीज खात्यात गर्दी केली. ह्या वेळार काय लोकांनी, बिला परस चड पयशांची मागणी केली आनी प्रस्न सुटावो करपाचें आस्वासन दिलें. हे लोक भायले आशिल्ले. आरटीओ भशेन वीज खात्यात सुद्दा वाडीव बिलांचो प्रस्न सुटावो करपाक एजंट आसा काय किदें? असो प्रस्न एल्विस गोम्स हांणी केला.
गोम्स हांणी बुधवारा अभियंते स्टीफन फर्नांडिस हांची भेट घेवन वाढीव बिलांचो मुद्दो मांडलो. बिलां विशी कागाळी सोडोवपा खातीर खात्यातूच कर्मचाऱ्यांची वेवस्था करपाची मागणी तांणी केली. फर्नांडीस हांणी मडगांवच्या अधीक्षक अभियंत्याकडेन संपर्क साधून उपाय काडपाचे निर्देश दिले.
सरकाराचें प्रशासन सारकें ना. मुखेल वीज अभियंत्यांच्या जापेचेर आमी समाधानी आसा, अशें एल्विस गोम्स हांणी सांगलें. आरटीओ भशेन वीज खात्यात एजंटगिरी सुरू जावपाक जाय ना, अशें काँग्रेसीन म्हणलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
