वीज खात्याक सरकारी कचेऱ्योच सगल्यांत चड थकबाकिदारः ढवळीकार

भांगरभूंय | प्रतिनिधी

पणजी: मार्च 2024 अखेरेक वीज खात्याचे सुमार 557 कोटी रुपया येवपाचे बाकी आसात. हातूंतले सगल्यांत मोटे थकबाकिदार विवीध सरकारी कचेऱ्यो आसात. तांणी वीज खात्याक सुमार 232.99 कोटी रुपया दिवप शिल्लक आसा. वीज मंत्री सुदिन ढवळीकार हांणी विधानसभेंत लेखी जापे वरवीं ही म्हायती दिली. हे विशीं विरोधी पक्ष फुडारी युरी आलेमांव आनी विरेश बोरकार हांणी स्वतंत्र प्रस्न उपस्थीत केल्ले.

जापे प्रमाण 557 पैकीं वेवसायीक गिरायकांचे 93.69 कोटी, उद्देगीक गिरायकांचे 213.16 कोटी जाल्यार हेर घरगुती गिरायकांचे सुमार 18 कोटी रुपया थकीत आसात. सरकारी कचेऱ्यांची थकबाकी चड आसली तरी फाटल्या वर्साचे तुळेन तातूंत सुमार 30 कोटी रुपयांचो उणाव जाला. वेवसायीक गिरायकांची थकाबकी फाटल्या वर्साचे तुळेन 1.43 कोटी रुपया जाल्यार उद्देगीक गिरायकांची थकबाकी 39.75 कोटी रुपयांनी वाडल्या.

मार्च 2024 अखेरेक सरकारी खात्यां मदीं वीज खात्याच्या विभाग 13 ची 3.69 कोटी रुपया थकबाकी आसा. भौशीक बांदकाम खात्याच्या विवीध विभागांची सुमार 1 कोटी, पणजी म्हानगर पालिका आयुक्तांची सुमार 35 लाख रुपया, गोंय वैजकी म्हाविद्यालयाची सुमार 1.28 कोटी रुपया, घाण उदक प्रक्रिया प्रकल्पाची सुमार 2 कोटी रुपया थकबाकी शिल्लक आसा. तशेंच पर्यटन, खेळ, कदंब म्हामंडळ, पुलीस खात्याची थकबाकी लेगीत लाखांनी रुपयांच्या घरांत आसा.

फाटल्या पांच वर्सांत सरकारा सयत हेर 3190 गिरायकांची थकबाकी ही 1 लाख रुपया वा चड आसा. हातूंतल्या 8 गिरायकांची वीज बिलाचे रकमे विशीं खटले सुरू आसात. तशेंच वीज खात्याच्या विवीध प्रकारच्या 729 गिरायकांची थकबाकी ही 75 हजार ते 99 हजार 999 रुपया मेरेन आसा. हातूंतल्या एका गिरायकाचो खटलो सुरू आसा. थकीत बिलांनी म्हयन्याक अतिरिक्त 1.5 टक्के शुल्क लागू करतात. ही थकबाकी केन्ना ना केन्ना तरी वसूल जायत आशिल्ल्यान खात्याच्या कामकाजाचेर परिणाम जायनाशिल्ल्याचें जापेंत म्हणलां.