भांगरभूंय | प्रतिनिधी
युरी आलेमांवः 2014 तलो व्हिडियो उजवाडावन विवीध मुद्द्यांचेर बोट
भांगरभूंय । प्रतिनिधी
मडगांवः तेन्नाचे प्रधानमंत्री पदाचे उमेदवार नरेंद्र मोदी हांणी मेरशे जाहीर सभेंत उलयतना गोंयाक विशेश दर्जो दितले अशें म्हणिल्लें. तें भूत गोंयचे मानगुटेर बसला. प्रधानमंत्री मोदी हांणी आतां तरी तातूंतल्यान गोंयकारांची सुटका करची, अशें विरोधी पक्ष फुडारी युरी आलेमांव हांणी म्हणलां.
प्रधानमंत्र्याचें गोंय भोंवडेच्या एक दीस आदीं 2014 त मेरशेंचे जाहीर सभेंत नरेंद्र मोदी हांच्या भाशणाचो व्हिडियो उजवाडाक हाडून युरी आलेमांव हांणी गोंयच्या संबंदीत विवीध मुद्दयांचेर तांचें लक्ष ओडलां आनी त्या विशयांचेर उलोवचें, असो उलो मारला.
भाजपा सरकाराच्या भांडवलशाय धोरणाक लागून गोंयचे अस्मितायेक गंभीर धोको निर्माण जाला. प्रधानमंत्री मोदी हांच्या फुडारपणा खालच्या सरकाराच्या पर्यावरण विरोधी, शेतकार विरोधी धोरणांक लागून गोंयचें पर्यावरण, रानां आनी रानवटी जीव धोक्यांत आयल्यात, अशें आलेमांव हांणी म्हणलां.
प्रधानमंत्र्यांच्या फुडारपणा खालच्या निती आयोगान जारी केल्ल्या अहवालांत गोंयांतले बेरोजगारीचो दर उक्तो जाला. भाजपा सरकार रोजगाराच्यो संदी तयार करपा संबंदांत नेणार आसा, अशें आलेमांव हांणी म्हणलां.
गोंय वैजकी म्हाविद्यालयाच्या हॉस्पिटलांत ऑक्सिजनाच्या उणावाक लागून कोरोना म्हामारीच्या काळांत शेंकड्यांनी दुयेंतींच्या मरणाचेर प्रधानमंत्र्यान उलोवप गरजेचें आसा. मोपा विमानतळ चालीक लागले उपरांत दाबोळी विमानतळाचें कितें जातलें, हाचेर प्रधानमंत्र्यान स्पश्टीकरण दिवचें. फाटल्या धा वर्सां सावन गोंयांत खण उद्देग बंद आशिल्ल्याचो प्रधानमंत्री मोदी हांकां आलेमांव हांणी उगडास करून दिला.
शेतकारांच्या लागवड करपाक योग्य आशिल्ल्या जमनीचेर येवपी प्रस्तावीत आयआयटी प्रकल्पाचेर प्रधानमंत्र्यान उलोवप गरजेचें आसा. पश्चीम घांटांतल्या जैवविवीधतेचो व्हड प्रमाणांत नाश करपी तीन रेशीय प्रकल्पांचेर उलोवपाची आपूण प्रधानमंत्र्यांक विनवणी करतां. आमची जिवनदायिनी आवय म्हादयचें उदक घुंवडावपाच्या कर्नाटक राज्याच्या यत्नांचेर प्रधानमंत्र्यान उलोवचें, अशी आलेमांव हांणी मागणी केल्या.
गोंयांचेर व्हड अर्थीक वजें आसा. भाजपा सरकारान गोंयाक खाकनवाळ केला. 2012 त सत्तेर आयले उपरांत भाजपा सरकाराक गोंय लोकायुक्तां कडल्यान भ्रश्टाचाराची 21 प्रमाणपत्रां मेळ्ळीं. प्रधानमंत्री हाचेर उलयतले, अशी आपल्याक आस्त आसा, अशें आलेमांव हांणी म्हणलां. गोंयाक कोळसो हब आनी कॅसिनो कॅपिटल करपाचे बाबतींत प्रधानमंत्र्यांनी तांच्या सरकाराची स्पश्ट भुमिका मांडपाची गरज आसा. गोंयचे भौशीक वितरण वेवस्थेंतल्या अन्नधान्याची जाल्ले नाशाडीची आनी चोरयेची प्रधानमंत्र्यान दखल घेवची, अशें आलेमांव हांणी म्हणलां.
पक्षांतरा विशीं प्रधानमंत्र्यान उलोवचेः आलेमांव
सामुहीक पक्षांतराक उर्बा दिवपी भाजपाशासीत खूबशां राज्यां विशीं प्रधानमंत्री नरेंद्र मोदी हांणी आपली भुमिका स्पश्ट करची. जनादेशाचो अपमान आनी लोकशायेचो खून आडावपा खातीर खर पक्षांतर विरोधी कायदो हाडपा संबंदांत प्रधानमंत्री घोशणा करतले काय, असो प्रस्न युरी आलेमांव हांणी उपस्थीत केला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
