भांगरभूंय | प्रतिनिधी
भांगरभूंय । प्रतिनिधी
वाळपयः दिवचलच्या भारत विकास परिशदे वतीन गुरू पुनवे निमतान दिवचलच्या स्वामी विवेकानंद स्मृती विवेकानंद ज्ञान मंदिरांत गुरू वंदना कार्यावळ आयोजीत करून शिक्षक आनी शिक्षकेतर कर्मचाऱ्यां खातीर आगळी-वेगळी गुरू वंदना ओपली.
ह्या वेळार निवृत्त मुख्याध्यापक प्रमोद येडवे हांणी गुरू-शिश्य पंरपरेक धरून भगवान बुद्ध, साने गुरूजी हांच्यो कथा विद्यार्थ्यांक सांगल्यो. फाटल्या चार वर्सांत विद्यालयाची शंबर टक्के निकालाची परंपरा तिगोवन दवोरले खातीर विकास परिशदे वतीन सगल्या शिक्षकांचो ह्या वेळार भोवमान केलो.
कार्यावळीत विद्यालयांतल्या गुणेस्त विद्यार्थ्यांचो भोवमान केलो. महादेव ज्ञानेश्वर पार्सेकार , साची सगुण गांवस, राही दत्ता राणें, साईशा सुरेश गांवस आनी वैश्णवी चंद्रशेखर गांवस हांचो आसपाव आशिल्लो. विद्यालयाचो प्रभारी मुख्याध्यापक गोपीनाथ गांवस हांणी सुरवेक सगल्यांक येवकार दिलो. राजेंद्र सावयकारान भारत विकास परिशदेच्या कार्याचा नियाळ घेतलो. माचयेर डॉ प्रवीण सावंत, आनंद जोशी आशिल्ले. परिशदेचो अध्यक्ष अनिल वेंगुर्लेकारान उपकार मानले. निवृत्त शिक्षिका आश्विनी लामगांवकारान सूत्रसंचालन केलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
