भांगरभूंय | प्रतिनिधी
भांगरभूंय । खबरां मेज
पणजीः पेडणे तालुक्यांत विर्नोडें हांगा राबितो करून आशिल्ल्या भटक्या समाजांतल्या माकडमाऱ्यांचीं जल्म नोंदणी करपा खातीर उत्तर गोंय जिल्हो कायदो सेवा सेवा प्राधिकरण आनी गोंय राज्य भुरगीं हक्क आयोगान खासा शिबीर आयोजीत केलां. ह्या वेळार भुरगीं आनी जाण्टे मेळून 63 जाणांच्या जल्माची नोंदणी करतले.
पेडण्यांतल्या सिनियर डिव्हिजन न्यायालयांत माकडमाऱ्यांची उसरां जल्म नोंदणी करपाचीं प्रकरणा हाडले उपरांत त्याच दिसा तांचेर सुनावणी घेवन ती निकालांत काडपाची न्यायाधीशान तयारी दाखयल्या. ते खातीर अर्ज आनी हेर कायदेशीर सोपस्कार करपा खातीर जाय तें सहकार्य करपाची तयारी मुफत कायदो सेवेतले वकील तशेंच पेडणे तालुको कायदो सेवा समितीन दाखयल्या.
गोंय राज्य भुरगीं हक्क आयोगाचो अध्यक्ष पीटर बॉर्जीस हांणी माकडमाऱ्यांची जल्म नोंदणी करपाची विनवणी करून गोंर राज्य कायदो सेवा प्राधिकरणाच्या कार्यकारी अध्यक्षा कडल्यान ताका मंजुरी घेतली. जल्म नोंदणी हो मनशाचो मूलभूत अधिकार आसा. हे नोंदणे वरवीं ताका शिक्षण, भलायकी आनी हेर हक्क मेळटात. भटक्या समाजांतल्या अशिक्षीत माकडमाऱ्यांक ताची कसलीच कल्पना ना. ते खातीर तांची जल्म नोंदणी करपाची गरज उप्रासली अशें तांणी सांगलें.
माकडमाऱ्यांक भुरगें जल्मतगीर ताची जल्म नोंदणी करपाक जाय हे खबर ना. ते खातीर सध्या तांचे कडेन जाय ते पुरावे नात. जल्म केन्ना जालो हें सांगपी साक्षिदार न्यायालयांत उबे करून उपरांत कायदेशीर सोपस्कार पुराय करून तांची जल्म नोंदणी करतले.
फोंडें तालुक्यांतल्या निरंकाल तशेंच राज्यांत हेर कडेन राबितो करून आशिल्ल्या माकडमाऱ्यांची जल्म नोंदणी करपाचें काम राज्य कायदो सेवा प्राधिकरण हातांत घेतलें. माकडमाऱ्यांक मतदान, अन्न सुरक्षा आनी सरकाराच्यो हेर येवजण्यांचो लाब मेळोवन दिवपाचेय यत्न करतले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
