विर्डी-सांखळेचो बाबलो कामत बेपत्ता

भांगरभूंय | प्रतिनिधी

आमोणें पुला कुशीक सांपडली दुचाकी; न्हंयेंत उडी घेतिल्ल्याचो दुबाव

फोंडें: विर्डी-सांखळेचो बाबलो शिवा कामत (52) आयतारा सकाळ सावन बेपत्ता जाल्लो. ताची दुचाकी आमोणें पुला कुशीक सांपडिल्ल्यान ताणें न्हंयेंत उडी घेतिल्ल्याचो दुबाव उक्तायतात. दिवचल उजो पालोवपी दळाचे कर्मचारी व्हड्याच्या आदारान सोमारा दनपार सावन सांजवेळ मेरेन बेपत्ता जाल्लो बाबलो कामत हाचो सोद घेताले.

मेळिल्ले म्हायती प्रमाण बाबलो कामत हो आयतारा फांतोडेर 5.30 वरां सावन बेपत्ता जाल्लो. कुटुंबांन दीसभर सोद घेतले उपरांत रातीं उसरां दिवचल पुलीस स्टेशनार बेपत्ता जाल्ल्याची कागाळ दिल्ली. बेपत्ता जाल्ल्या बाबलो कामत हाची दुचाकी सोमारा सकाळीं आमोणें पुला कुशीक सांपडली. ताका लागून बाबलो कामतीन न्हंयेंत उडी घेतिल्ल्याचो दुबाव उक्तायतात.

हे संबंदीची म्हायती दिवचल उजो पालोवपी दळाचे कचेरेंत दिले उपरांत वरिश्ठ अधिकारी शैलेश गावडे हांच्या मार्गदर्शना खाला सोद कार्याक सुरवात जाली. सोमारा सांजवेळ मेरेन व्हड्याच्या आदारान बेपत्ता व्यक्तीचो सोद घेतलो.

गोपां कडल्यान मेळिल्ले म्हायती प्रमाण बेपत्ता जाल्लो बाबलो कामत हाच्या एका पांयाक दुखापत जाल्ली. ताचेर गोंय वैजकी म्हाविद्यालयांत उपचार केल्ले. पूण आयतारा सकाळीं अचकीत बेपत्ता जाल्ल्यान कुटुंबान ताचो सोद घेवपाक सुरवात केल्या.