भांगरभूंय | प्रतिनिधी
मुख्यमंत्रीः महाराष्ट्राच्या कागदपत्रांची जातली तपासणी, प्रवाहा कडेन हरकत करतले नोंद
भांगरभूंय । प्रतिनिधी
पणजीः विर्डी धरणा संबंदांत गोंय सरकार महाराष्ट्राक नोटीस जारी करतलें. आयज ही नोटीस जारी जातली, अशें मुख्यमंत्री डॉ. प्रमोद सावंत हांणी सांगलें.
केंद्रान मान्यताय दिल्ल्या म्हादय उदका वेवस्थापन प्राधिकरणा कडेन (प्रवाह) महाराष्ट्राच्या विर्डी धरणा विशीं गोंय सरकार हरकत मांडटलें. तशेंच विर्डी धरणा खातीर महाराष्ट्रान जे परवाने घेतल्यात तांची गोंय सरकार तपासणी करतलें. उदका पुरवण खात्याचे मुखेल अभियंते पी. बी. बदामी हांणी ही म्हायती दिली.
विर्डी धरणाच्या कामाची खात्याच्या अधिकाऱ्यां कडल्यान पळोवणी सुरू आसा. पळोवणी पुराय जाले उपरांत अधिकारी अहवाल सादर करतले. अहवाला उपरांत विर्डी धरणाचो प्रकल्प कितें आसा आनी कितलें काम पुराय जाला, ताची म्हायती मेळटली, अशें बदामी हांणी म्हणलां.
कटिका व्हाळाचेर धरण बांदपाचो महाराष्ट्राचो यत्न आसा. व्हाळवाट, कटिका ह्यो म्हादयच्यो उपन्हंयो आसात. म्हादय लवादान 2018 त निवाडो दिला. ह्या निवाड्यांत गोंया सयत महाराष्ट्र तशेंच कर्नाटकाक उदकाचो कांय वांटो दिला. लवादाच्या निवाड्याक तिनूय राज्यांनी न्यायालयांत आव्हान दिलां. सर्वोच्च न्यायालयाच्या आदेशा उपरांत म्हादय लवादाचो आदेश अधिसुचीत जाला. म्हादय लवादाच्या आदेशा प्रमाण कर्नाटकान कळसा आनी भांडुरा प्रकल्पाचो आराखडो तयार करून दिल्ली मान्यताय फाटीं घेवपाची मागणी गोंय सरकारान केंद्रा कडेन केल्ली आसली तरीय ती अजून मान्य जावंक ना. लवादाच्या निवाड्या प्रमाण म्हादयचें उदक वापरपाचे महाराष्ट्राचे यत्न आसात. हाका लागून विर्डी धरणाचें काम तांणी सुरू केलां, अशी म्हायती बदामी हांणी दिली.
आतां प्राधिकरणा कडेन हरकत नोंद करची पडटली. म्हादय उदकाच्या वेवस्थापना खातीर केंद्रान म्हादय उदका वेवस्थापन प्राधिकरण स्थापन करपाक मान्यताय दिल्या. प्रवाह हें प्राधिकरणाचें नांव. ह्या प्राधिकरणा कडेन गोंय सरकार हरकत मांडटलें. म्हादयच्या उदका संबंदांतल्यो सगळ्यो हरकती आतां प्रवाह प्राधिकरणा कडेन नोंद करच्यो पडटल्यो. प्राधिकरण स्थापन करपाची मागणी गोंयान केंद्रा कडेन केल्ली. प्रवाह प्राधिकरणाचें कार्यालय गोंयांत जावचें, अशे सरकाराचे यत्न सात. प्रवाह प्राधिकरणाक लागून म्हादयच्या उदकाचेर नदर दवरप शक्य जातलें, अशें मुख्यमंत्री डॉ. सावंत हांणी स्पश्ट केलां.
प्राधाकरणाचेर गोंय, महाराष्ट्र आनी कर्नाटकाच्या अधिकाऱ्यां सयत केंद्र सरकाराचे अधिकारी वांगडी आसतले. विर्डी धरणाच्या कामाचीं कागदपत्रां गोंय सरकार महाराष्ट्रा कडेन मागतलें. धरणाचें काम सुरू करपाक पर्यावरणीय दाखल्यांची गरज आसता. सरकार कागदपत्रांची तपासणी करतलें. परवाने आसले तरीय कायदेशीर मार्ग सोदपाचे पर्याय आसात, अशें मुख्यमंत्री डॉ. सावंत हांणी सांगलें. महाराष्ट्रांत जेन्ना काँग्रेस- राष्ट्रवादीचें सरकार आशिल्लें तेन्ना म्हादय बचाव अभियानान महाराष्ट्राचे तेन्नाचे उपमुख्यमंत्री सर्गेस्त आर. आर. पाटील हांची भेट अभियानान घेतिल्ली. विर्डी धरण बांदून कटिका व्हाळाचें उदक घुंवडावपा परस तिळारीचें उदक महाराष्ट्रान वापरचें. तसो प्रस्ताव तुमी गोंय सरकाराक सादर करचो, अशी सुचोवणी अभियानान आर. आर. पाटील हांचे कडेन केल्ली. प्रस्तावाचेर विचार करपाचें तांणी आस्वासन दिल्लें. हे घडणुकेक आतां खूब वर्सां जालीं. गोंय सरकारान हाचेर महाराष्ट्रा कडेन कसलीच उलोवणी करूंक ना, अशें अभियानाची निमंत्रक निर्मला सावंत हांणी सांगलें.
म्हादय बचाव अभियानाची आदींच हरकतः निर्मला सावंत
विर्डी धरणा वरवीं उदक घुंवडावपाचे महाराष्ट्राचे यत्न आदीं सावन चल्ल्यात. म्हादय बचाव अभियानान गोंय सरकारा कडेन पयलींच हरकत नोंद केल्या, अशें निमंत्रक निर्मला सावंत हांणी सांगलें. गोंय सरकार गंभीर ना, हे खातीर केंद्र तशेंच न्यायालयांत महाराष्ट्रा आड हरकत घेवंक ना, अशेंय तांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
