भांगरभूंय | प्रतिनिधी
भाजप मंत्री, आमदारां कडल्यान विरोधकांचेर टिका
पणजी : विरोधी आमदारांची वागणूक म्हणल्यार गोंयांत खऱ्या अर्थान लोकशायेक घातक आसा, अशें ट्वीट मुख्यमंत्री डॉ. प्रमोद सावंत हांणी केलां. विरोधी आमदारां कडेन मुद्दे नाशिल्ल्यान राजकी लावा खातीर ते आरोप करतात अशें मुख्यमंत्री डॉ. प्रमोद सावंत हांणी म्हणलां.
सभापती मुख्यमंत्र्यांच्या नोकरा भशेन वागतात, ह्या विजय सरदेसाय हांच्या आरोपाचेर खवदळ पडला. ह्या आरोपाक लागून सभापतींनी मंगळारा विरोधी आमदारांची भेट न्हयकारली. भौशीक बांदकाम खात्याचे मंत्री निलेश काब्राल तशेंच आमदार राजेश फळदेसाय हांणी लेगीत विरोधकांचे कृतीक हरकत घेतल्या.
सभापतीपद हें मानाचें पद आसता. सभापतीं आड अपमानास्पद विधानां करपाची कृती अयोग्य आसा. गोंयांत विरोधी आमदारांची वागणूक लोकशाये खातीर घातक आसा. विरोधकां कडेन कसलेच मुद्दे नात. प्रसिद्धी खातीर ते तथ्यहीन आरोप आनी उलोवपां करतात, अशें ट्वीट मुख्यमंत्री डॉ. प्रमोद सावंत हांणी केलां.
विधानसभेचें शिंयाळें अधिवेशन चार दिसांचें आसतलें. अधिवेशनाचो समन्स जारी जाला. अधिवेशनाच्या प्रस्नाचेर भौशीक बांदकाम खात्याचे मंत्री निलेश काब्राल हांणी पत्रकार परिशद घेतली.
पयलें अधिवेशन 4 ते 5 दिसांचें आसता : काब्राल
वर्साच्या पयल्याच अधिवेशनांत राज्यपालांचें अभिभाशण जाता. हें अधिवेशन 4 ते 5 दिसांचें जाता. हाचे उपरांत अर्थसंकल्पी अधिवेशन चड तेप चलता. हाचे पयलीं चडशा वेळार अभिभाशणाचें अधिवेशन 4 ते 5 दिसांचेंच जालां अशें मंत्री निलेश काब्राल हांणी सांगलें. नवे वर्स आतांच सुरू जातलें. ह्या अधिवेशना उपरांत अर्थसंकल्पी अधिवेशन जातलें. अर्थसंकल्पी अधिवेशना उपरांत पावसाळी अधिवेशन जातलें. हाचे उपरांत लेगीत अधिवेशन जावप शक्य आसा. हाका लागून लोकांचे प्रस्न मांडपाची संद विरोधी आमदारांक मेळटली. विजय सरदेसाय हे ज्येश्ठ वांगडी आसात. खूबशीं वर्सां ते विधानसभेंत आसात. सभापतींचेर आरोप करप अयोग्य आसा अशें निलेश काब्राल हांणी म्हणलें.
विजय भाजपांत येवपाक केन्नाय तयार : फळदेसाय
युरी आलेमांव विरोधी पक्ष फुडारी आसात. विजय सरदेसाय हे विरोधी पक्ष फुडाऱ्या भशेन वागतात. तांचो सल्लो काँग्रेसीच्या आमदारांनी घेवचो न्हय अशें राजेश फळदेसाय हांणी म्हणलें. विजय सरदेसाय भाजपांत येवपाक केन्नाय तयार आसात अशें तांणी म्हणलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
