विमानतळाच्या उक्तावणाक प्रवेश चुकलो

भांगरभूंय | प्रतिनिधी

लोकांनी उक्तायली नाराजी; पास आसून वेळार पावले नात

भांगरभूंय । प्रतिनिधी

पेडणें: पेडणें म्हालांतल्या आनी पर्यायान उत्तर गोंयांतल्या लोकांचें एक सपन आशिल्लें आनी तें पुराय जातना पळोवपा खातीर 13व्या आंतरराष्ट्रीय ग्रीनफिल्ड मोपा विमानतळ प्रकल्पाच्या उक्तावणा खातीर खूबशे लोक राविल्ले. 11 डिसेंबराक उक्तावण सुवाळ्याक येवपा आशिल्ल्यांनी दनपारां 2 वरां आदीं सभाघरांत येवचे आनी आपली बसका घेवची, असो निर्णय सुरक्षेच्या कारणां वयल्यान घेतिल्लो. पूण पयसुल्ल्यान आयिल्ल्या लोकांक मातसो कळाव जालो तशेंच तांकी परस चड लोक सभाघरांत आदींच आशिल्ल्यान खूबशा लोकांक परतून वच्चें पडलें. तातूंत पेडणें म्हालांतल्या खूबशा सरपंच, उपसरपंच, पंच, जिल्हो पंचायत वांगडी, प्रतिश्ठीत नागरीक हांचोय आस्पाव आशिल्लो. प्रवेश मेळूंक नाशिल्ल्यान ते नाराज जाले.

मोपा विमानतळाच्या उक्तावणा खातीर आमदारांनी आपल्या समर्थकांक, कार्यकर्त्यांक पास दिल्ले. ते घेवन ते आयिल्ले. पास आशिल्ले, पूण वेळाचेर पावूंक नाशिल्ल्यान तांकां प्रवेश मेळूंक ना. अशे हजारांनी लोक परतून वतना मोपा विमानतळ वाठारांतल्या दोनूय गेटींचेर दिसताले.

हळदोणें वाठारांतल्या एका ज्येश्ठ नागरिकान प्रतिक्रिया दितना सांगलें, आमी ज्येश्ठ नागरीक आसून लेगीत आमकां प्रवेश दिवंक ना. प्रधानमंत्री नरेंद्र मोदी हांचें भाशण आयकुचे खातीर आमी पयसुल्ल्यान आयिल्ले. ही कार्यावळ पळोवची इत्सा आशिल्ली, पूण ती पुराय जावंक ना. तरी लेगीत आमी बेजार ना, कारण मोपा विमानतळ सुरू जाता हाची खोस आसा. आमचे कडेन पास आशिल्लो. जंय थळाव्या पत्रकारांक प्रवेश दिनाशिल्ले, थंय आमकां तरी प्रवेश कसो मेळटलो, असो प्रस्न किरण शेट्ये हांणी उपस्थीत केलो. सरकारान विचार करिनासतना कार्यावळीचें आयोजन आनी नियोजन केल्लें. सभाघराची तांक नासतना आमकां आपोवन सरकारान आपलेंच हाशें करून घेतलां, अशें तांणी सांगलें.

मुख्यमंत्र्यांक जाब विचारतलीचः तारा हडफडकार

आपूण बेजार जाल्या. आमकां ह्या प्रकल्पाच्या उक्तावणा खातीर आपयिल्ले. आमकां निमंत्रण लेगीत मेळिल्लें. आमी मातशीं उसरां आमच्यो गाडयो घेवन विमानतळ वाठारांत पावलीं, पूण आमकां प्रवेश दिवंक ना. हो आमचेर अन्याय. ज्या वेळार मुख्यमंत्री मांद्रें मतदारसंघांत येतले तेन्ना तांकां जाब विचारतलीं, अशी प्रतिक्रिया मांद्रेंची उपसरपंच तारा हडफडकार हांणी दिली.