भांगरभूंय | प्रतिनिधी
24 हजार 467 कोटींच्या विनियोग विधेयकाक मान्यताय
भांगरभूंय । प्रतिनिधी
पणजी : खासगी विधेयकां सयत रिणां वयल्यान विनियोग चर्चे वेळार सरकार तशेंच विरोधकां मदीं खडाजंगी जाली. मुख्यमंत्री डॉ. प्रमोद सावंत हांणी चर्चेक जाप दिले उपरांत विनियोग विधेयकाक सभाघरान मान्यताय दिली. चर्चे उपरांत सभाघरात 24 हजार 467 कोटींचे विनियोग विधेयक संमत जालें. उपरांत खात्यांच्या 586 कोटींच्या मागण्यांच्या विनियोग विधेयकाक सभाघरान मान्यताय दिली.
विनियोग विधेयकाचेर विजय सरदेसाय तशेंच दिगंबर कामत हांचीं भाशणां जालीं. सरकार अंत्योदय तत्वाचेर काम करता. डबल इंजीन सरकाराक लागून राज्यांत 20 हजार कोटीं परस चड रुपयांचो निधी मुळाव्या सुविधां खातीर मेळ्ळा. जी जमीन कोणाच्याच नांवाचेर ना, ती बळकावन विकपाचे प्रकार घडल्यात. चवकशे खातीर सरकारान एसआयटी स्थापन केल्या. जी जमीन कोणाच्याच नांवाचेर ना, ती सरकाराक मेळपाक जाय. कोणाच्याच नावार नाशिल्या 110 जमनींचे सर्वे नंबर सरकारान जाहीर केल्यात. या जमनींचेर दावो करपाची मेकळीक आसा. केंद्रा कडल्यान राज्याक व्हड प्रमाणांत निधी मेळटा. फाटल्या 3 म्हयन्यांत सरकारान फक्त 100 कोटींचें रीण घेतलां. कल्याणकारी येवजण्यो चालूच आसा, अशें मुख्यमंत्री डॉ. प्रमोद सावंत हांणी सांगलें.
विधेयका वयल्यान आरोप- प्रत्यारोप
धिरयो कायदेशीर करपा सयत पोगो विधेयक सभाघरांत येवंक ना. पोगो विधेयक अर्थीक फांट्या कडेन धाडलां. हाचे वयल्यान विजय सरदेसाय आनी निलेश काब्राल हांचे मदीं आरोप- प्रत्यारोप जाले.
वेंझी विएगस हांणी धिरयो कायदेशीर करपा खातीर विधेयक सादर केल्लें. हाचे पयलीं 2009 त विधानसभेंत हें विधेयक संमत जाल्लें. आलेक्स रेजिनाल्ड हांणी तें विधेयक मांडिल्लें. राष्ट्रपतीन ताचेर सय करपाक न्हयकार दिल्लो. हाका लागून तें विधेयक कायद्यांत रूपांतरींत जावंक शकलें ना. हाका लागून हे खेपे धिरयो विधेयक येवंक ना, अशें
मुख्यमंत्र्यांनी सांगलें. सरकार चुकीची आकडेवारी सांगता, असो आरोप विजय सरदेसाय हांणी केलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.