विधवा प्रथे विशीं फुडल्या अधिवेशनांत निर्णय

भांगरभूंय | प्रतिनिधी

पणजी: विधवा प्रथा बंदी विशीं केंद्र वा राज्य सरकारान आतां मेरेन कसलोच कायदो केल्लो ना. पूण ह्या विशया विशीं जागृताय जावप सामके गरजेचें आसा. विधानसभेच्या फुडल्या अधिवेशनांत हाचेर चर्चा करून योग्य तो निर्णय घेवं अशी हमी मुख्यमंत्री डॉ. प्रमोद सावंत हांणी शुक्रारा विधानसभा सभाघरांत उलयतना दिली.

गोंयांत विधवा प्रथा बंदीचो कायदो करपाची मागणी आमदार युरी आलेमांव हांणी शुक्रारा केली. विधवा बायलां विशीं जावपी भेदभाव, तांचे वयलो अन्याय, अत्याचार नश्ट करपा खातीर आनी जगपाचें पुराय स्वातंत्र्य दिवपा खातीर ह्या कायद्याची गोंयांत सामकी गरज आसा अशें आमदार युरी आलेमांवान म्हणलें.

परंपरीक, धर्मीक आनी समाजीकतायेच्या नांवार गोंयांतले कांय वाठारांनी अजुनूय विधवा प्रथा सुरू आसा. अश्यो प्रथा विधवा बायलांचो अपमान करपी आसात. हातूंत बायलेक उणाक लेखतात. ताका लागून ही प्रथा बंद जावप गरजेचें आसा. विधवा बायलां मदीं मनीस आसता हाचें भान समाजान दवरप गरजेचें आसा अशेंय तांणी नमूद केलें.

हे चर्चेंत वांटेकार जातना आमदार दिगंबर कामत, विजय सरदेसाय आनी संकल्प आमोणकार हांणी लेगीत युरी आलेमांव हांचे मुद्दे योग्य आसात. सरकारान हे बाबतींत जाता तितले बेगीन कायदो करपाची आनी विधवा बायलांक सन्मानान जगपाचो अधिकार दिवपाची मागणी लावन धरली.

हाचेर उलयतना, विधवा प्रथा हो गंभीर विशय आसा. ताका लागून ह्या विशयाचेर फुडल्या अधिवेशनांत चर्चा करून योग्य तो निर्णय घेतले अशें मुख्यमंत्री डॉ. प्रमोद सावंत हांणी म्हणलें.