भांगरभूंय | प्रतिनिधी
भांगरभूंय । प्रतिनिधी
फोंडेंः फोंडें अंत्रूज पत्रकार संघान लोकमान्य टिळक पुण्यतीथ तशेंच पत्रकार दिसा आयोजीत केल्ल्या विद्यालयीन पांवड्या वयल्या समूहगीत गायन सर्तींत बोरयेच्या प्रगती विद्यालयान पयलें इनाम मेळयलें. थळावो आमदार आनी कृशी मंत्री रवी नायक हांचे हस्तुकीं इनाम वितरण जालें.
समूहगी गायन सर्तींत आल्मेदा हायस्कूल पंगडाक दुसरे आनी कवळेंच्या हांगच्या एसएस समिती हायस्कूल पंगडाक तिसरें इनाम फावो जालें. शिरोड्याच्या सिम्बॉयसीस हायस्कूल, बोरयेचें स्वामी विवेकानंद हायस्कूल हांकां उमेद वाडोवपी इनामां फावो जालीं. शेखर आडपयकार आनी संदीप बोरकार हांणी परिक्षक म्हणून काम पळयलें.
पत्रकारांनी लोकां सामकार सत मांडून लोकां मदी सकारात्मक विचार पावोवपाक जाय. समाजाक जाग्रूत करपी पत्रकारांनी समाजांत सुधारण करपाक लेगीत योगदान दिवपाक जाय अशें नायक हांणी सांगलें. कार्यावळीक फोंडें पालिका मंडळचो नगराध्यक्ष रितेश नायक, उद्देजक संदीप निगळ्ये आनी पत्रकार संघाचो अध्यक्ष दुर्गादास पै माचयेर आशिल्लो.
कृशी मंत्री रवी नायक हांच्या पालवान फोंड्यात लायब्ररी सुरू करतले अशी म्हायती रितेश नायक हांणी दिली. संदीप निगळ्ये हांचें उलोवप जालें. कार्यावळीचें सूत्रसंचालन अजय बुवा, नरेंद तारी आनी अजय बागकार हांणी केलें. दुर्गाप्रसाद पै हांणी प्रास्तावीक केलें आनी सदानंद सतरकारान निमाणे उपकार मानले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
