भांगरभूंय | प्रतिनिधी
शिक्षण खात्यान परिपत्रक काडून लेगीत कसलीच कारवाय ना
भांगरभूंय । प्रतिनिधी
पणजीः शाळेच्या बॅगाचें वजन विद्यार्थ्याच्या वजनाचे तुळेंत 10 टक्क्यां परस उणें आसपाक जाय, अशें स्पश्ट निर्देश दिवन लेगीत शाळांनी ताका पाळो दिनात. शिक्षण संचालनालयान हे विशींचें परिपत्रक शाळांनी काडून आठ वर्सां जालीं तरी लेगीत विद्यार्थी बॅगांचें वजें घेवन शाळांनी वतात हें नदरेक पडटा.
राष्ट्रीय भुरगीं हक्क राखण आयोगान काडिल्ल्या पत्रकाच्या आदाराचेर शाळेक वचपी विद्यार्थ्यांच्या बॅगांचें वजन तांच्या वट्ट वजनाचे तुळेंत 10 टक्क्यां परस चड आसचें न्हय, अशें परिपत्रक शिक्षण संचालनालयान काडिल्लें. हे खातीर शाळांनी संदर्भ पुस्तकांचो वापर उणो करचो, वेळापत्रका प्रमाण तांकां पुस्तकां हाडपाक सांगचीं आनी पुस्तकां शाळेंत दवरपा खातीर लॉकर्स दिवचे, अशें संचालनालयान सांगिल्लें. पूण अजून मेरेन बॅगांचें वजें मात उणें जावंक ना. ज्या शाळांनी शिक्षण खात्याच्या निर्देशांक पाळो दिवंक ना, त्या शाळांचेर अजून मेरेन सरकारान कसलीच कारवाय करूंक ना. विद्यार्थी आपल्या जिवा परस चड वजनाचीं बॅगां फाटीर मारून शाळेची वाट धरतात.
हे विशीं उलयतना शिक्षण संचालक शैलेश झिंगडे हांणी सांगलें, बॅगांच्या वजना विशीं उगडास करून दिवपा खातीर आमी कसलीच नवी सुचोवणी काडूंक ना. फक्त 2017 त खात्यान एक परिपत्रक काडिल्लें.
जेन्ना शिक्षका वांगडा आमची बसका जाता तेन्ना आमी उगडास करून दितात. पयलीचें परिपत्रक आसा तें कांय जाण व्हॉट्सअॅप ग्रुपच्या माध्यमांतल्यान शाळे मेरेन पावोवन ताची जाणविकाय करून दितात. तशेंच शाळा वेवस्थापन आनी विभागीय शिक्षण अधिकारी हांचे बसकेंत आमी हे विशीं तांकां सांगतात, अशी म्हायती झिंगडे हांणी दिली.
कांय शाळांनी ह्या निर्देशाक पाळो दितात. पूण कांय शाळा अश्यो आसात हे आमी करता म्हूण तोंडांत सांगतात. प्रत्यक्षात विद्यार्थी जड बॅगां घेवन शाळेंत वतना आमकां नदरेक येतात. बॅगांचें वजन उणें उरचें म्हूण आमी शाळांक सांगिल्लें, तांणी विद्यार्थ्यांक नवीं पुस्तकां घरां दवरपाक सांगून शाळेंत पयलीच्या पुस्तकांचो वापर करून तांकां शिकोवचें, अशें झिंगडे हांणी म्हणलें. कांय शाळा हें करूंक पावनात हाचीं खूबशीं कारणां आसात. कांय शाळां कडेन पयलींचीं पुस्तकां दवरपा खातीर लॉकर्स नात. तशेंच कांय शाळा सकाळीं आनी दनपारां अश्या दोन आदेसांनी वर्ग घेतात आनी जेन्ना परिक्षेची तयारी करची आसता. ते खातीर चड पुस्तकां व्हरचे परस दुसरो पर्याय नासता. हे खातीर ह्या बॅगांचें वजन वाडिल्लें आसता, अशें झिंगडे हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
