भांगरभूंय | प्रतिनिधी
पणजी ः दाबोळेंतल्या एका उच्च माध्यमिक शाळेंतल्या विद्यार्थ्यांक मशिदींत जाल्ल्या एके इस्लामीक कार्यशाळेक घेवन गेले. ते कार्यावळींत विद्यार्थ्यांक हिजाब घालपाक लायले, ह्या आरोपा खाला शाळेच्या वेवस्थापनान प्राचार्य शंकर गांवकार हांकां निलंबीत केल्यात.
विश्व हिंदू परिशदेच्या कार्यकर्त्यांनी दिल्ले म्हायती प्रमाण, दाबोळेंतल्या उच्च माध्यमीक शाळेंतल्या विद्यार्थ्यां खातीर मशिदींत कार्यशाळा घडोवन हाडिल्ली. चलयांनी हिजाब घालचो अशें तांकां सांगिल्लें. ही कार्यशाळा ‘इस्लामीक विद्यार्थी संघटना’ हे संस्थेन आयोजीत केल्ली. विशेश गजाल म्हळ्यार शिक्षण खात्यान अशे कार्यशाळे खातीर पत्रक काडूंक ना.
वयलें प्रकरण उजवाडाक आयले उपरांत आयज सकाळीं विश्व हिंदू परिशदे सयत जायत्यो हिंदुत्ववादी संघटना शाळे लागसार जमल्यो आनी तांणी ह्या संबंदी जाब विचारलो. मजगतीं, ही गजाल उजवाडाक आयले उपरांत शाळा वेवस्थापनान रोखडेच शाळेचे प्राचार्य शंकर गांवकार हांकां निलंबीत केले. विहिंपन ही कार्यशाळा म्हणल्यार ‘स्कूल जिहाद’ असो गंभीर आरोप केला. ही विद्यार्थी संघटना बंदी घाल्ले पीएफआय संघटने कडेन संबंदीत आसा, असो दावोय तांणी केला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
