भांगरभूंय | प्रतिनिधी
परराश्ट्र राज्यमंत्री कीर्ति वर्धन सिंह हांची लोकसभेंत म्हायती
नवी दिल्ली, खबरां संस्था ः अमेरिकेन भारतीय स्थलांतरीतांक परतून भारतांत धाडले उपरांत देशभरांत बोवाळ जालो. हाचे उपरांत शुक्रारा लोकसभेंत विदेशी बंदखणींतल्या भारतीय कैद्यां विशीं म्हायती दिली. परराश्ट्र राज्यमंत्री कीर्ति वर्धन सिंह हांणी लोकसभेंत लेखी प्रस्नाक जाप दितना सांगलें, विदेशांतल्या बंदखणींत 10,152 भारतीय कैदी आसात. हातूंत न्यायालयीन कैद्यांचोय आस्पाव आसा.
विदेशांतल्या बंदखणींत खटलो सुरु आशिल्ल्ये आनी दोशी सिध्द जाल्ल्या कैद्यांची आंकडेवारी लोकसभेंत जाहीर केली. साउदी अरेबिया, कुवेत, युएई, कतार, नेपाळ, पाकिस्तान, यूएस, श्रीलंका, स्पेन, रशिया, इझ्रायल, चीन, बांगलादेश, आर्जेन्टिना ह्या सारक्या 86 देशांनी कितले कैदी आसात हाची म्हायती मुखार आयल्या. साउदी अरेबियांतल्या बंदखणींत 2,633 आनी संयुक्त अरब अमीरातांतल्या बंदखणींत 2,518 कैदी आसात अशें आंकडेवारीतल्या स्पश्ट जालां.
नेपाळाचे बंदखणींत 1,317 भारतीय नागरिक आसात. पाकिस्तान आनी श्रीलंकेन दिल्ले म्हायती प्रमाण, तांच्या बंदखणींत अनुक्रमान 266 आनी 98 कैदी आसात. न्यायालयीन कैदी आनी ख्यास्त भोगपी कैदी मेळून 10,152 कैदी 86 देशांच्या बंदखणींत आसात अशें राज्यमंत्री सिंह हांणी सांगलें.
कतारांत जाल्ल्या फिफा विश्व करंडा उपरांत केरळांतल्या भोवसंख्य नागरिकांक बंदखणींत दवरल्यात. सरकाराक हें विशीं खबर आसा? असो प्रस्न लोकसभेंत विचारिल्लो. हाका जाप दितना राज्यमंत्र्यांनी सांगलें, परराश्ट्र मंत्रालयाकडेन आशिल्ले आंकडेवारी प्रमाण, कतारच्या बंदखणींत 611 भारतीय कैदी आसात. पूण गुप्तताय कायद्यांक लागून कतार सरकाराक संबंदीत कैद्यांची म्हायती तांच्या संमती बगर उक्ती करपाक मेळना.
विदेशांतल्या बंदखणींतल्या भारतीय कैद्यांक मजत दिवपा खातीर सरकार कटिबद्ध आसा अशेंय राज्यमंत्र्यांनी आपल्या जापेंत सांगलें. परदेशांत भारतीय नागरिकाक अटक केल्यार रोखडीच ही म्हायती भारतीय दूतावासाक दितात. हाचे उपरांत परराश्ट्र कार्यालयाचे अधिकारी रोखडेंच बंदखणी कडेन संपर्क सादतात आनी अटक केल्ल्या भारतीय नागरिकाक मजत करतात. ताका अटक केल्ल्याची म्हायती तपासल्या उपरांत ताका कॉन्सुलर ॲक्सेस दितात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
