भांगरभूंय | प्रतिनिधी
भांगरभूंय । प्रतिनिधी
केरी- सत्तरीः पोस्तवाडो होंडा हांगचो साहित्यीक आनी पत्रकार विठ्ठल नागेश गावडे पारवाडकार हाका खोलपेवाडी- साळ हांगच्या मुक्तांगण प्रकाशन संस्थेचो बाल साहित्य पुरस्कार ज्येश्ठ साहित्यीक आनी आदले उप सभापती शंभू भाऊ बांदेकार हांचे हस्तुकीं दिवचलच्या दीनदयाळ सभाघरांत आयोजीत केल्ले कार्यावळींत भेटयलो. ह्या वेळार ज्येश्ठ पत्रकार राजू भिकारो नायक, कवियित्री तशेंच गोंय मराठी अकादमीची कार्यकारिणी वांगडी प्रा पोर्णिमा राजेंद्र केरकार, प्रा. सोमनाथ पिळगांवकार, डॉ महेश वसंत पवार, करिअर मार्गदर्शक रामदास केळकार आनी साहित्यीक चंद्रकांत रामा गांवस हाजीर आशिल्ले.
शाल, श्रीफळ, मानपत्र आनी यादस्तीक अशें पुरस्काराचें स्वरुप आशिल्लें. अनघा गांवस हिणे मानपत्राचें वांचन केलें. जेन्ना संकश्टां येतात तेन्ना आपलें मन लेखनांत रिगयल्यार ती लक्षांत रावनात. सकारात्मक विचार समाजा मेरेन पावोवपा खातीर आपूण लेखन करतां अशें पारवाडकारान आपल्या मनोगतांत सांगलें. महेश पवार हांणी ह्या वेळार आपले विचार मांडले. सूत्रसंचालन सोमनाथ पिळगांवकारान केलें आनी स्वाती कोटकारान उपकार मानले.
पारवाडकाराची आतां मेरेन 32 पुस्तकां प्रकाशीत जाल्यांत. तातूंत 6 संगीत, 6 सामाजीक नाटका, एक काल्पमीक नाटक, चार इतिहासीक नाटकां, चार एकांकी, दोन कविता झेले, दोन ललित लेख, एक लघुकता झेलो हांचो आसपाव आसा. तांची सात पुस्तकां प्रकाशनाचे वाटेर आसात. तांका जायते पुरस्कार फावो जाल्यात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
