भांगरभूंय | प्रतिनिधी
संवसारीक टी-20 सर्तीच्या दुसऱ्याय दिसा धपको बसपी निकाल पळोवपाक मेळ्ळो. स्कॉटलॅण्डान अश्टतासांच्या प्रदर्शना नेटार पावसान आडखळ हाडिल्ले पात्रताय फेरयेंतले ब गटांतले मॅचींत दोन खेपेचो वस्ताद वॅस्ट इंडिजाक 42 धांवड्यांनी हारयलो.
दोन दिसां पयलीं श्रीलंकेक दुबळ्या नामिबिया कडल्यान हारीचो धपको सोंसचो पडिल्लो. ते उपरांत वॅस्ट इंडिजान लेगीत श्रीलंकेचो धडो गिरयलो.
वॅस्ट इंडिजान टॉस जिखून पयलीं बॉलींग करपाचो निर्णय घेतलो. ते उपरांत स्कॉटलॅण्डाचो ओपनर जॉर्ज मुंसेन 53 बॉलांनी णव चवक्यांचे मजतीन नाबाद 66 धांवड्यांची खेळी केली. ताचेच बॅटिंगेक लागून स्कॉटलॅण्डाक आव्हानात्मक स्कोर उबारप शक्य जालो.
ते उपरांत वॅस्ट इंडिजाचो डाव 18.3 ओव्हरींनी फक्त 118 धांवड्यांचेर सोंपयलो. संवसारीक टी-20 सर्तीच्या सुपर 12तलें आव्हान कायम राखपाक फाल्यां झिम्बाब्वे आडची मॅच खंयचेय परिस्थितींत जिखपाकूच जाय. तशेंच दुसरे वटेन सुपर 12तली सुवात निश्चीत करपाक स्कॉटलॅण्डाक आयर्लेण्डा आड जैत जोडचें पडटलें.
जितल्यो टी-20 मॅची खेळपाक जाय आशिल्ल्यो तितक्यो मॅची आमकां खेळपाक मेळूंक ना. पूण, आमी खूब वन ड मॅची खेळ्ळ्यात. तातूंत मेळिल्लो अणभवाचो फायदो टी-20 करून घेवपाचो आमचो यत्न आसा अशें स्कॉटलॅण्डाचो प्रशिक्षक रिची बेरिंगटनान म्हणलें.
स्पिनरांनी कालचे मॅचींत म्हत्वाच्या खिणाक विकेटी घेतल्यो. वॉट हांणी बरी सुरवात करून दिली. तो सदांच म्हत्वाच्यो विकेटी घेतात. लिस्कान लेगीत सेगीत चार ओव्हरींनी जबरदस्त प्रदर्शन केलें अशें तांणी मुखार म्हणलें.
आमकां उरिल्ल्या मॅचींनी खर मेहनत घेवची पडटली आनी दोन मॅची लेगीत जिखच्यो पडटल्यो. आमी जापसालदारकी घेवन प्रदर्शन करचें पडटलें अशें वॅस्ट इंडिजाचो निर्शेल्लो मुखेली निकोलस पुरनान म्हणलें.
पावसाक लागून 20 मिनटांचो ब्रेक लेगीत स्कॉटलॅण्डा खातीर फायदेशीर थारलो. पावसाक लागून खेळ आनीक स्लो जालो.
स्लो खेळपट्टीचेर 161 धांवड्यांची मोख लेगीत चड दिसपाक लागली. हाचें मुख्य कारण म्हणल्यार वॅस्ट इंडिजाचे बॅटिंगेंत खोलाय ना. तशेंच मॅचीच्या मदल्या ओव्हरींनी आक्रमक बॅटींग करपी शिमरोन हेटमायराची लेगीत गैरहाजेरी जाणावली.
ओपनर कायल मायर्सान 13 बॉलांनी तीन चवके आनी एका सक्याचे मजतीन 20 धांवड्यो करून विंडिजाक बरी सुरवात करून दिल्ली. पूण, मुन्सान तिसरे ओव्हरींत डीप मिडविकेट वाठारांत मायर्साची कॅच धरून ताची खेळी सोंपयली.
दुसरो ओपनर ब्रॅण्डन किंग लेगीत 15 बॉलांनी 17 धांवड्यो करून पावर प्लेंत बाद जालो. ते उपरांत वॅस्ट इंडिजाचो पंगड जैत जोडटलो अशें एकदांय दिसूंक ना.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
