भांगरभूंय | प्रतिनिधी
ट्राफीक सिग्नल्स बसोवपा खातीर अडेज कोटी खर्च करपाचो प्रस्ताव
वास्को: गतीन वाहनां चलोवप्यांचो सोद घेवन तांकां तालांव दिवपा खातीर म्हामार्गार विवीध सुवातींनी आनीक सीसीटीव्ही कॅमेरे बसोवपाचो विचार चालू आशिल्ल्याचें येरादारी मंत्री मॉवीन गुदिन्हो हांणी काल (शुक्रारा) सांगलें. वाहन चलोवप्यांनी रात आसली म्हूण गतीन वाहनां चलोवची न्हय. स्वताचो जीव मोलादीक आसा हाची जाण दवरपाचें आवाहन तांणी केलें. तशेंच गतीन वाहन चलोवन अपघातांत सांपडले उपरांत दरेक गजालीं खातीर सरकाराक दोश दिवपा बदला स्वता गतीर नियंत्रण दवरपाची गरज तांणी उक्तायली.
जुवारी पुलार जाल्ल्या अपघातांत पुलाचो कठडो मोडून मोटार जुवारी न्हंयेंत पडून चार जाणांक मरण आयलें. ते संबंदी मंत्री गुदिन्हो हांणी दुख्ख उक्तायलें. ह्या अपघाताक लागून म्हाका स्वताक खूब दुख्ख जाल्ल्याचें तांणी सांगलें.
हांव येरादारी मंत्री ह्या नात्यान सेफ्टी कावन्सिलाचो अध्यक्ष आसा. ताका लागून लोकांचे सुरक्षेक म्हत्व दितात. आमी सुरक्षीताताये कडेन केन्नाच तडजोड करचे नात. हाका लागून येरादारी खात्या वतीन कांय सुवातींनी रस्तो येरादारी नेमा संबंदी आनी ट्राफीक सिग्नल्स बसोवपा खातीर येरादारी खात्या वतीन अडेज कोटी खर्च करपाचो प्रस्ताव आसा. हीं कामां भौशीक बांदकाम खात्या वतीन करतले. पूण निधी येरादारी खात्या वतीन दितले अशें मंत्री गुदिन्हो हांणी म्हणलें.
नवो जुवारी पूल सगले सुरक्षेची काळजी घेवनूच येरादारी खातीर एक लेन येता त्या डिसेंबर मेरेन उक्ती करतले. ताकतीक करून उपेग नाशिल्ल्याचें तांणी सांगलें. सरकारी यंत्रणेन दक्षता घेतिल्ली आसली तरी वाहन चलोवप्यांनी स्वताचे सुरक्षे संबंदी योग्य ती खबरदारी घेवपाची गरज आशिल्ल्याचें गुदिन्हो हांणी म्हणलें.
तालांव येतलो घरा: गुदिन्हो
दीस आसूं वा रात आसूं गतीचेर नियंत्रण येवपा खातीर कांय सुवातींनी सीसीटीव्ही कॅमेरे बसोवपा फाटल्यान वाहन चालकांचे गतीर नियंत्रण येवचें हो हेतू आसा. जे गतीन वाहनां चलयतात तांच्या घरा तालांव येतलो. तांकां सोडचे नात. तांकां मात्शी तरी भिरांत दिसूंक जाय अशें मॉवीन गुदिन्हो हांणी स्पश्ट केलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
