भांगरभूंय | प्रतिनिधी
दुबाविताक अटक; वास्को पुलिसांची कारवाय
वास्को: पाटणा एक्सप्रेसींतल्यान आयिल्ल्या टिळकधारी यादव (34) हाका वास्को पुलिसांनी अटक करून ताचे कडल्यान सुमार 7 लाख रुपयांचो गांजो जप्त केलो. ताचे कडेन सात किला परस चड गांजो मेळ्ळो. दुबावीत टिळकधारी हाका हाचे पयलीं 2006 वर्सा गांजो प्रकरणांत अटक केल्ली.
पुलिसांनी दिल्ले म्हायती प्रमाण पाटणा एक्सप्रेसीन जौनपूर उत्तर प्रदेशाचो एक मनीस गांजो घेवन येवपाचो आसा अशी म्हायती वास्को पुलिसांक खबऱ्यान दिल्ली. ते प्रमाण वास्कोचे पुलीस निरिक्षक कपील नायक हांणी पंगड तयार करून रेल्वे स्टेशना भायर तैनात केलो.
पाटणा एक्सप्रेस वास्को रेल्वे स्टेशनार आयले उपरांत स्टेशना भायर सरिल्ल्या प्रवाशां मदली एक व्यक्ती खबऱ्यान वर्णन केल्ले व्यक्ती कडेन मिळती जुळती आशिल्ल्यान पुलिसांनी ताका ताब्यांत घेतलो. ताचे कडेन आशिल्ल्या बॅगेची तपासणी केली तेन्ना तातूंत गांजो सांपडलो.
दुबावीत टिळकधारीन गांजो वेवस्थीतपणान अॅरबॅगांत गुठलावन दवरिल्लो. ताका रितसर अटक केली. हाचे पयलीं 2006 वर्सा 176 ग्राम गांजो बाळगिल्ल्या प्रमाणांत ताका अटक केल्ली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
