भांगरभूंय | प्रतिनिधी
वास्को: एके दुचाकीक धपको दिले उपरांत मोटार चालककान मोटारी सयत पळ काडलो. ह्या अपघातांत जुआंव कुलासो (79) हो जाण्टो मनीस जखमी जालो. ह्या प्रकरणांत वास्को पुलिसांनी पंचनामो केला.
सेबिस्तान फ्रान्सिस्को डायस आनी जुआंव कुलासो हे दोगूय जाण शार वाठारांतल्या पालिका उद्याना लागसरच्या भितरल्या रस्त्यान दुचाकीन वताले. डायस हे दुचाकी चलयताले, जाल्यार कुलासो हे फाटल्यान बशिल्ले. ते थंयच्या चौकांत पावतकूच एका मोटारीन दुचाकीक धपको दिलो. ताका लागून दुचाकी वेले दोगूय सकयल पडले.
कुलासो हांचे तकलेचे फाटले वटेन जखम जाल्या. ह्या अपघाता उपरांत मोटार चालक थंय रावनासतना मोटारी सयत पळ काडलो. त्या मोटारचालकाचे कृतीचेर लोकांनी तिडक उक्तायली.
मजगतीं, वास्को पुलिसांनी अपघाताची नोंद केल्या. उपअधिक्षक सलीम शेख आनी निरिक्षक कपील नायक हांच्या मार्गदर्शना खाला हेडकॉन्स्टेबल आशीश नायक फुडलो तपास करतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
