भांगरभूंय | प्रतिनिधी
भांगरभूंय । प्रतिनिधी
वास्को: एका सान पिरायेचे चलयेचें (पिराय 17) अपहरण करून बलात्कार केल्ल्या प्रकरणांत वास्को पुलिसांनी एका ड्रायव्हरा सयत चार जाणांक अटक केली. ह्या चवगांनी तिचेर वेगळ्यावेगळ्या वेळार बलात्कार केल्ल्याचें उक्तें जालां. दुबावितां आड अपहरण प्रकरणांत भादंसं 363, गोंय बाल कायदो 8 खाला तशेंच सान पिरायेचे चलयेचेर बलात्कार प्रकरणांत 374-आर/डब्ल्यू, 4(अ)12 पोस्को कायद्या खाला गुन्यांव नोंद केला.
वास्को पुलिसांनी दिल्ले म्हायती प्रमाण ही चली बेपत्ता आशिल्ल्या प्रकरणांत तिचे आवयन 11 ऑगस्ट 22 दिसा वास्को पुलीस स्टेशनार कागाळ दाखल केल्ली. वास्को पुलिसांनी कागाळीची दखल घेवन अपहरणाचो गुन्यांव नोंद करून चवकशी सुरू केली. ते चलयेचो सोद घेवपा खातीर पुलीस पंगड तयार केले. तपास करता आसतना 16 ऑगस्टाक ती सान पिरायेची चली खंय आसा हाची सुलूस लागली, तेन्ना तिका ताब्यांत घेतलें.
समाजीक संस्थेच्या पदाधिकार्यांचे हाजिरेंत तिची जबानी घेतली तेन्ना तिणें सगली म्हायती पुलिसांक सांगली. ही म्हायती मेळटकूच निरिक्षक कपील नायक हांच्या मार्गदर्शना खाला पुलिसांनी दोन वरां भितर त्या चार जाणांक अटक केली. त्या चवगां मदल्या एका वळखीच्या ड्रायव्हरान ती सान पिरायेची आशिल्ल्याचो गैरफायदो घेवन ऑगस्ट 2021 वर्सा बलात्कार केल्लो. जाल्यार हेर तिगांनी 11 ऑगस्ट 2022 पसून बेपत्ता जाले उपरांत वेगळ्यावेगळ्या प्रसंगार तिचेर बलात्कार केलो. ही घडणूक वास्को घडली.
वास्को पुलिसांनी अपहरण आनी बलात्कार प्रकरणांत अटक केल्ल्या दुबावितांचीं नांवां मुकूंद रावळ (35), गुरूवेंकटेश गुरू स्वामी (30), कूश जयस्वाल (30), अफतार हुसैन (23) अशीं आसात. ह्या दुबावितांचो तपास करपा खातीर उपनिरिक्षक स्वप्नील नायक, उपनिरिक्षक रोहन नागेशकार, उपनिरिक्षक मयूर सावंत हांणी निरिक्षक कपील नायक हांच्या मार्गदर्शना खाला खर कश्ट घेतले. उपअधिक्षक राजेश कुमार हांच्या मार्गदर्शना खाला निरिक्षक कपील नायक अदीक
तपास करतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
