वास्को सप्ता मनोवपाचो निर्णय सगळ्यांचो

भांगरभूंय | प्रतिनिधी

प्रशांत जोशीः विवीध पार समित्यांनी केल्लो आरोप भायर मारलो

भांगरभूंय । प्रतिनिधी

मुरगांवः बाजारकार उत्सव समितीन सगळ्या पार समित्यांक विस्वासांत घेवन अंदूंचो वास्कोचो श्री दामोदर भजनी सप्ता मनोवपाचो निर्णय घेतला. आमचे कडेन पार समितीचे बसकेचो इतिवृतांत नोंद आसा. अशें उद्देजक तशेंच केंद्रीय समितीचे अध्यक्ष प्रशांत जोशी हांणी शेनवारा सांगलें आनी पार समित्यांनी आपणांक विस्वासांत घेवंक नाशिल्ल्याचो श्री दामोदर भजनी सप्ता उत्सव (बाजारकार) समितीचेर केल्लो आरोप भायर मारलो.

हे पत्रकार परिशदेंत जोशी हांचे वांगडा उत्सव समितीचे अध्यक्ष कृष्णा सोनुर्लेकार, सचीव संतोष खोर्जुवेंकार, भांडारी विष्णू गारुडी, शेखर खडपकार, दीपक नार्वेकार, रघुनाथ खोबरेकार हाजीर आशिल्ले.

शुक्रारा 29 जुलयाक गाडेकार समाज मुरगांव पत्तनन्यास फैलवाले कामगार संघ, नाभीक समाज, श्रीराम विश्वकर्मा ब्राह्मण समाज ह्या पार समित्यांनी पत्रकार परिशद घेतिल्ली. तातूंत तांणी बाजारकार म्हणल्यार उत्सव समितीन अंदूंच्या वास्को सप्ता उत्सवांत पार आनी गायनाच्यो बैठकी करच्यो न्हय असो बसकेंत निर्णय घेतिल्लो, अशें सांगिल्लें. तशेंच निमाण्या खिणाक सगळ्या पार समित्यांक विस्वासांत घेनासतना उत्सव समितीन पार आनी गायनाच्या बैठकींचें आयोजन केलां, असो आरोप विवीध पार समितीच्या प्रतिनिधींनी केल्लो.

आमी सगळ्या पार समित्यांक सप्ता उत्सवांत वांटो घेवपाची विनवणी करतात. जर उण्या वेळाक लागून पारांची वेवस्था करप शक्य ना जाल्यार ते दिंडी मिरवणूक काडपाक शकतात, अशेंय जोशी हांणी सांगलें.

आमी हे निर्णय आदीं घेवपाक शकले नात, कारण कोवीड मार्गदर्शक तत्वां आनी सप्ता आयोजन करपा खातीरचे निर्बंध लक्षांत घेवन सरकारान घेतिल्ल्या निर्णयाक लागून आमी लेगीत सप्ता मनोवपाचो निर्णय घेवंक नाशिल्लो, अशें जोशी हांणी स्पश्ट केलें. फाटल्या 123 वर्सांचो इतिहास आशिल्ले धर्मीक कार्यावळींत राजकारण हाडचें न्हय, अशी विनवणी तांणी विवीध पार समित्यांक केल्या. उत्सव समितीचे सचीव संतोष खोर्जुवेंकार हांणी सांगलें, पार समितींच्या हेर वांगड्यांनी पत्रकारां मुखार वच्चे आदीं पार दिंडीच्या आयोजना संबंदांत बाजारकार वा श्री दामोदर भजनी सप्ता समिती कडेन चर्चा करपाक जाय आशिल्ली.