वास्को शारांत अवजड गाडयांक दिसाची बंदी

भांगरभूंय | प्रतिनिधी

आठ दिसांनी आदेशाची खर अंमलबजावणीः आमदार कृष्णा साळकार

भांगरभूंय । प्रतिनिधी

वास्कोः दक्षीण गोंय जिल्होधिकारी कार्यालयान चिखली चौक ते आयओसी चौक मेरेनच्या रस्त्या वयल्यान सकाळीं 7 ते रातच्या 10 वरां मेरेन अवजड गाडयांक येरादारी करपाक बंदी घालपी आदेश जारी केला. ताका लागून प्रदुशण आनी अपघातांचेर नियंत्रण येतलें, अशें वास्कोचे आमदार कृष्णा साळकार हांणी म्हणलां.

ह्या आदेशाची सात- आठ दिसांनी पुराय तरेन अंमलबजावणी जातली. ह्या आदेशा संबंदांत मुरगांव पालिका, भौशीक बांदकाम खात्यान गरजेच्या सुवातांचेर तकटे लावपाक जाय, अशें साळकार हांणी सांगलें. शारांत अवजड गाडयांची येरादारी चालू आशिल्ल्यान लोकांक खूब त्रास जाताले. कांय खेपे अवजड गाडयो इंधन भरचे खातीर शारांतल्या पॅट्रोल पंपाचेर येताल्यो. ताका लागून सकाळच्या आदेसाक भुरग्यांक घेवन शाळेंत येवपी पालकांक तांचो त्रास जातालो. आतां बायणा उड्डाण पूल तयार जाल्ल्यान आनी त रस्तो वरुणापुरी मांगोरहील वाठारांतल्या म्हामार्गाक जोडिल्ल्यान अवजड गाडयांची येरादारी बायणा उड्डाण पुला वयल्यान करची, अशी थळाव्या लोकांनी नेटाची मागणी केल्या. हाची दखल घेवन आमदार साळकार हांणी मुख्यमंत्री, सरकारी यंत्रणा तशेंच जिल्होधिकारी कार्यालयाक निवेदनां दिल्लीं. ते संबंदांत दखल घेवन जिल्होधिकारी कार्यालयान तीन दिसां आदीं आदेश काडला. ह्या आदेशाक लागून कदंबा बशी, सिटी बशी तशेंच गरजेच्या वस्तूंची पुरवण करपी गाडयो सोडून हेर अवजड गाडयांक शारांत येवपाक बंदी आसतली. हो आदेश पाळिनाशिल्ल्या गाडयांच्या चालकांक कारवायेक फुडो करचो पडटलो, अशें आदेशांत म्हणलां.

इंधन भरपाक लेगीत प्रवेश नाः कृष्णा साळकार

वास्को शारांतल्यान येरादारी करपाक अवजड गाडयांक बंदी घातिल्ल्यान शारांतल्या रस्त्या वयलो ताण उणो जातलो, तशेंच अपघातांचेरूय नियंत्रण येतलें. खूबशा अवजड गाडयांच्या धनयांचो शारांतल्या पॅट्रोल पंप धनया कडेन उदारी संबंदांत कबलात आसा. ताका लागून हाचेर योग्य उपाय मेळा मेरेन रित्या अवजड गाडयांक इंधन भरचे खातीर मेकळीक दिवची अशी मागणी केल्या. गर्देच्या वेळार रिती लेगीत अवजड गाडयो शारांत येवप धोकादायक आसा. तांणी म्हामार्गा वयल्या पॅट्रल पंप धनयां कडेन कबलात करची, असो उलो आमदार कृष्णा साळकार हांणी मारला.