भांगरभूंय | प्रतिनिधी
मुरगांवः वास्को शारांत कितले बांगलादेशी नागरीक रावतात, तें सोदून काडचे खातीर वास्को पुलिसांनी साबार घरांनी वचून भाड्यान रावपी लोकांची खरसाणीन तपासणी मोहीम सुरू केल्या.
गोंयांत बेकायदो येवन राबितो केल्ल्या बांगलादेशी नागरिकांक आपल्या घरांत भाड्याचे कुडींत भाडेकरू म्हूण दवरचे आदीं कांय घरधनयांनी ते विशीं पुलिशेक म्हायती दिवंक ना. आतां मेरेन राज्यांत बेकायदो तरेन रावपी 23 बांगलादेशी नागरिकांक धरल्यात. गोंयांत आनिकूय बांगलादेशी नागरीक आसपाक शकतात. तशेंच गोंयांत कावलां अड्डे आशिल्ले मनीस आनी प्लास्टीक एकठांय करपाचो वेवसाय करप्यां मदीं व्हड संख्येन बांगलादेशी आशिल्ल्याचें उजवाडाक आयलां. हेच लोक गोंयांत व्हड प्रमाणांत गुन्यांव करतात, अशेंय दिसून आयलां. हे संबंदांत आतंकवादी विरोधी पंगडाक सक्रीय केला आनी ते साबार सुवातांचेर धाडी घालीत आसात. गोंयांतल्या विवीध वाठारांनी ह्या बांगलादेशी नागरिकांचो वावर आनी राबितो आसा. तांकां अटक करून तांचीं कागदपत्रां ताब्यांत घेवन म्हायती एकठांय करपाचें काम सुरू आसा. मजगतीं, पुलिसांक दरेका वाठारांत वचून भाड्यान रावप्यांची खोलायेन चवकशी करपाचे आदेश दिल्यात. वास्को पुलिसांनी ही मोहीम सुरू केल्या. वास्को पुलीस स्टेशनाचे निरिक्षक कपील नायक हांणी सांगलें, आमी नेमाना भाड्यान रावपी लोकांची चवकशी करताले. पूण आमी ह्या दिसांनी मोहिमेक गती दिल्या. कारण उत्तर गोंयांत बेकायदो तरेन रावपी खूबशे बांगलादेशी नागरीक सांपडल्यात. म्हायती दिवपी फॉर्म भरिनासतना रावप्यांचेर आनी तांची म्हायती घेनासतना तांकां भाड्यान कूड दिवपी घरधनयांचेर खर कारवाय करतले.
दरेका घराची तपासणी करपाचो आदेशः नायक
सोमारच्यान आमी एक खर मोहीम हातांत घेतल्या. हे आदींच आमी जांणी भाडेकरी फॉर्म भरूंक नात अशा सुमार 15 लोकांक ताब्यांत घेतल्यात. दरेका घराची तपासणी करपाचो आदेश आपणें पुलीस कर्मचाऱ्यांक दिला. कारण खूबशे लोक भाडेकरूंची पुराय म्हायती घेनासतनाच तांकां बिराडाक दवरतात, जाचो फायदो गुन्यांवकार घेतात, अशें वास्कोचे पुलीस निरिक्षक कपील नायक हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
