भांगरभूंय | प्रतिनिधी
वास्को: मुरगांव पालिकेन स्वातंत्र्य पथा वेल्या बडोदा बँका मुखार आशिल्ले मेकळे सुवातेर आपले मर्जींतल्या एका फर्निचर विक्रेत्याक परवानगी दिले उपरांत ताणें थंयची पार्कींग सुवात आनी फुटपाथ आडायल्या. ताका लागून चलून वचपी आनी दुचाकी चालकां खातीर व्हड प्रमाणांत गैरसोय जायत आसा. चलून वचप्यांक जीव मुठींत घेवन रस्त्या वेल्यान चलचें पडटा.
फुटपाथा वेलें अतिक्रमण सोंसून घेवचे नात अशें सांगपी मुरगांव पालिकेन आपलो नेम मोडून संबंदीत विक्रेत्याच्या ताब्यांत फुटपाथ सोंपयिल्ल्यान वाठारांत विवीध प्रतिक्रिया उक्तायतना दिसून येतात.
वास्को सप्ता निमतान स्वातंत्र्य पथाचे दोनूय वटांनी फर्निचराचीं दुकानां आसतात. पूण अंदूं एफएल गोम्स मार्गार उड्डाण पुलाचें बांदकाम सुरू आशिल्ल्यान थंयची येरादारी स्वातंत्र्य पथा वटेन वळयली. ताका लागून थंयचीं फर्निचराचीं दुकानां तानिया हॉटेला मुखा वेले मेकळे सुवातेंत घालूंक दिल्लीं. पूण मुरगांव पालिकेन आपल्या मर्जीतल्या एका फर्निचर विक्रेत्याक मात स्वातंत्र्य पथा वेल्या बडोदा बँके मुखार आशिल्ले मेकळे सुवातेर दुकान घालपाक परवानगी दिल्ली. ते खातीर एका नगरसेवकान खासा फुडाकार घेतिल्लो. त्या नगरसेवकाच्या अर्थकारणा खातीर हांगा प्रतिक्रिया उक्तायतना दिसून येतात.
तो फर्निचर विक्रेतो खास आशिल्ल्यान ताणें थंयचो फुटपाथ आनी दुचाकी पार्किंगेचे सुवातेर अतिक्रमण केलां. ताका लागून दुचाकी चालकांक आपलीं वाहनां उबीं करूंक मेळनात. कांय जाण रस्त्यार आपली दुचाकी उबी करून आपल्या कामां खातीर वतात. फुटपाथार अतिक्रमण केल्ल्यान चलून वचप्यांक रस्त्या वयल्यान चलून वचचें पडटा. ह्या प्रकरणांत मुरगांव पालिकेचे अधिकारी कारवाय करतले व्हय असो प्रस्न लोक उपस्थीत करीत आसात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
