भांगरभूंय | प्रतिनिधी
वास्को: रॉय पॅत्रॉल पंपा मुखा वयल्या रस्त्या कुशीक उबी केल्ले दुचाकीक अचकीत उजो लागून पुराय जळून गेली. उजो लागले उपरांत मुरगांवचे आदले नगराध्यक्ष नंदादीप रावत हांणी उजो पालोवपी दळा कडेन लॅण्डलायनीचेर संपर्क सादपाचो यत्न केलो. पूण ही सेवा अस्तित्वांत नाशिल्ल्याचें उक्तें जालें. ताका लागून लॅण्डलायन फोन तरी चालू दवरचो वा संपर्क सादपा खातीर एखादो मोबायल क्रमांक दिवचो अशी विनंती तांणी केल्या.
एक मनीस शुक्रारा सकाळीं आपली दुचाकी रस्त्याचे कुशीक उबी करून एटीएमांत गेल्लो. तो एटीएमांतल्यान भायर आयले उपरांत ताचे दुचाकीच्या फुडल्या भागांतल्यान धुंवर येत आशिल्ल्याचें दिसून आयलें. ताणें हेर वाहनांक धोको निर्माण जावचो न्हय हे खातीर आपली दुचाकी दुसरी कडेन व्हरून उबी केली तेन्ना अचकीतपणान उज्यान पेट घेतलो. ह्या वेळार आशिकुशीच्या तरणाट्यांनी उजो पालोवपाचो यत्न केलो. उजो पालोवपी दळाक फोन केलो. तो मेरेन उज्यान पेटन घेवन दुचाकीचो गोबर जाल्लो.
हे घडणुकेक लागून येरादारीक कांय वेळ आडमेळीं निर्माण जाली.
वास्को उजो पालोवपी दळाची नवी इमारत बांदपा खातीर उजो पालोवपी दळ आल्त दाबोळी वाठारांत हालयलां. ते विशीं रावत हांणी म्हणलें की, शार वाठारांत पॅत्रॉल पंप आशिल्ल्यान उजो पालोवपी दळान एखादो एक बंब पयलींचे सुवातेर उबो करचो. जाका लागून आणिबाणीच्या वेळार ताचो वापर करूंक मेळटलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
