भांगरभूंय | प्रतिनिधी
वास्को: वास्को कदंब बस स्टॅण्डा वयल्यो कांय गैरसोयी प्रवाशांक त्रासदायक थारूंक लागिल्ल्यान त्यो पयस करपा खातीर म्हामंडळान पावलां उबारपाची गरज आसा. ह्या स्टॅण्डा वयल्यान सुटपी बस गाडया विशीं योग्य म्हायती प्रवाशांक मेळत नाशिल्ल्यान प्रवाशांक ताटकळत उबे रावचें पडटा. एखादी बसीची फेरी रद्द जाली वा एखादी बस नादुरुस्त जाली हें कळपा खातीर थंय कसलोच मार्ग ना. थंय आशिल्ल्या मनशा कडल्यान योग्य जापो मेळनात. एके वटेन केंद्र सरकार ‘स्वच्छ भारत’ अभियान राबयता, जाल्यार दुसरी कडेन ह्या बस स्टॅण्डार कोय उडोवपा खातीर कोयरा पेटयो नदरेक पडनात. थंय एकठांय जावपी कोयराचो विलो लावपा खातीर तो थंयच लासून उडयत आशिल्ल्याचें चित्र दिसून येता.
वास्कोचे आमदार कृष्णा साळकार हांच्या यत्नाक लागून वास्को कदंब बस स्टॅण्डा वयल्या रस्त्याचें हॉटमिक्स केल्लें. ताका लागून प्रवाशांची व्हड गैरसोय पयस जाल्या. पूण हेर गैरसोयी पयस करपा खातीर म्हामंडळाचे थळाव्या अधिकार्यांनी लक्ष दिवपाची गरज आसा. थंय एखादी बस नादुरुस्तीक लागून सुटची ना ते संबंदी म्हायती मेळना. थंय म्हायती दिवपा खातीर ध्वनीक्षेपकाचो वापर जायना. बस आयली ना म्हणून एखाद्या प्रवाशान विचारल्यारूच ताका बस नादुरुस्तीक लागून तिची फेरी रद्द केल्ल्याचें सांगतात.
काल (आयतारा) सकाळीं इकराचे मजगतीं सांखळी वचपी बशीची वाट पळयत कांय प्रवाशी उबे आशिल्ले. पूण सवाय इकरा जाली तरी बस स्टॅण्डार येवंक नाशिल्ल्यान थंयच्या कावंटराचेर चवकशी केले उपरांत संबंदीन व्यक्तीन ती बस येवची ना. आतां साडेइकराच्या बशीन चलात असो सल्लो दिलो. सदर बस रद्द जाल्ल्याची म्हायती दिवपा खातीर कशलीच वेवस्था बी ना? असो प्रस्न विचारल्यार ते व्यक्तीन बस स्टॅण्डाचें बस पोर्टांत रुपांतर जाय मेरेन रावात अशें सांगलें.
स्टॅण्डार प्लास्टीक ग्लास, खाद्यपदार्थाचीं रितीं पाकिटां आनी हेर कोयर उडोवपा खातीर कोयरा पेटयोच नात. ताका लागून संबंदीत प्रवाशी थंयच कोयर उडयतात. एकठांय जाल्ल्या कोयराची उचल करिनासतना तो थंयच लासून उडयत आशिल्ल्याचें चित्र दिसून येता. कोयर लासपा बदला तो एकठांय करून पालिकेच्या कामगारां कडेन दिवपाची गरज आसा. पूण हांगा दुसरेंच चित्र नदरेक पडटा.
स्टॅण्डार प्रवाशांक बसपा खातीर योग्य बांक नात. ताका लागून थंय बशीचीं सिटां दवरल्यांत. थंय पाखें उबारपा खातीर लोखंडाचे खांब पुरल्यात. ताचे भोवतणीं घाल्ल्या सिमेंटाच्या चौथर्याचो वापर आसन म्हूण करतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
