भांगरभूंय | प्रतिनिधी
उदका पायप लायन बदलपाची मागणी
वास्को, प्रतिनिधी ः वास्कोच्या मांगोरहिलच्या मारुती मंदिर वाठारांतल्या गटार आनी जमनीपोंदा आशिल्ल्या गटारांतल्यान येवपी घाणयारे उदक घरांनी उदक वचपी नळाच्या पायपांनी मिक्स जाला आनी ते वाठारांत रावपी लोकांनी ते पियेल्ल्यान लोकांक ओंकारी आनी मोडशी जावपाक लागल्या. हे संबंदी थंयच्या लोकांनी उदका पायप लायन बदलपाची मागणी केल्या.
मारुती मंदिर वाठारांतल्या गटारांतल्यान, गटाराच्या कुशीकच्यान, गटारावयल्यान कांय उदका पायप लायन आसात. ह्यो उदका पायप लायनी सुमार पंचवीस वर्सां आदीं घाल्ल्यो. त्यो आतां इबाडल्यात. देखून गटारांतल्यान येवपी घाणयारे उदक ह्या उदका पायपांनी मिक्स जाता. हाचे पयलींय अशें घडिल्लें. त्या वेळार नगरसेवक नारायण बोरकारान थंय नवीन उदका पायप लायन घालपाचें काम स्वताच्या खर्चान केल्लें. पूण आतां दुसरे वटेनच्या उदकाच्या पायपांनी घाणयारे उदक मिक्स जाल्ल्याचे प्रकार घडटा. पयलीं नळाचें उदकांत घाणयारे उदक मिक्स जाता हे थंयच्या लोकांक कळ्ळें ना. पूण जेन्ना उदकाक घाण वास येवपाक लागलो तेन्ना थंयच्या लोकां मदीं भिरांत पातळ्ळी. आनी ते उदक पियेल्ल्यान कांय लोकांक ओंकरी, मोडशी जावपाक लागली. ह्या प्रकरणाची म्हायती मेळटकूच नगरसेवक बोरकार हांणी थंय वचून पळोवणी केली. तशेंच उदकाची पायप लायन गटारांतल्यान, गटाराच्या कुशीकच्यान घालचे बदला त्यो योग्य सुवातेर सावन घेवपाची गरज आसा. देखून घाणयारे उदक आनी उदकाचे पायप लायन संपर्कांत येवचे नात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
