भांगरभूंय | प्रतिनिधी
मुरगांवः वास्कोंत बेशिस्त वाहनां पार्क करून वाहन चालक राज्य येरादारी नेम मोडटात. शार वाठारा वांगडाच हेर कडेन येरादारी तकटे आसून लेगीत वाहन चालक मेळत थंय आपलीं वाहनां दवरतात. तशेंच शारांत खूब कडेन येरादारी तकटे नाशिल्ल्यान वाहन चालक ताचो गैरफायदो घेतात. ते खातीर वास्को येरादारी पुलिसांनी बेशिस्त वाहन पार्क करप्यांचेर खर कारवाय करची, अशी ह्या वाठारांतल्या लोकांनी मागणी केल्या.
वास्को बंदर शार आशिल्ल्यान थंय व्हड प्रमाणांत अवजड वाहनांची येरादारी आसता. ताका लागून मुरगांव पालिका आनी वास्को येरादारी पुलिसांनी शारांतल्या सगळ्याच रस्त्यांचे कुशीक येरादारी नेमांचे तकटे लायल्यात. कांय कडेन रस्त्या वयले दिशा दाखोवपी तकटे पेड्डेर जाल्ल्यान वाहन चालक आपलें वाहन थंय उबें दवरून येरादारी नेम मोडटात. स्वतंत्रपथ मार्ग आनी एफ. एल. गोम्स मार्गाचेर चडशे सुवातांचेर येरादारी नेमाचे तकटे नाशिल्ल्यान वाहन चालक ताचो गैरफायदो घेवन आपलीं वाहनां उबीं दवरतात. ताका लागून संबंदीत विभागान पयलीं जंय जंय येरादारी नेमांचे तकटे नात थंय ते लावचे, अशी मागणी लोकांनी केल्या.
वास्को बसस्टॅण्डाचेर व्हड प्रमाणांत येरादारी नेम मोडटात. थंय बॉम्बे डायींग मुखार वाहनां उबीं दवरपाक मनाय आसून लेगीत चारचाकी, दुचाकी दवरतात. हाका लागून प्रवाशांत बशींत चडटना बेशिस्त दवरिल्ल्या वाहनांक लागून आडखळ जाता. सिने वास्को थिएटरा मुखार सद्दां येरादारी पुलीस येरादारीचेर नियंत्रण दवरपा खातीर उबो आसता. पूण बॉम्बे डायींग मुखार बेशिस्त तरेन दवरिल्ल्या वाहनांचेर कारवाय मात करिना. वास्को येरादारी पुलीस निरिक्षक शैलेश नार्वेंकार हांणी दाबोळी विमानतळ ते वास्को गांधीनगर राष्ट्रीय म्हामार्गाचेर बेकायदो पार्क केल्ल्या वाहनांचेर कारवाय करतले अशी शिटकावणी दिल्या. ते प्रमाण वास्को शारांत बोशिस्त वाहन दवरप्यांचेर कारवाय करची, अशी मागणी लोकांनी केल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
