वाळपय ‘सम्राट संगीत सितारा’

भांगरभूंय | प्रतिनिधी

0 संगीत-सुरांची जातली जुगलबंदी
0 पयली उपांत्य फेरी आयज
0 गोंय-महाराष्ट्रांतले 10 कलाकार
0 वाळपयच्या रसिकांक पर्वणी
भांगरभूंय प्रतिनिधी
वाळपय ः सम्राट क्लब इंटरनॅशनल आनी सम्राट वाळपय हांच्या जो़ड पालवान सम्राट संगीत सितारा हे शास्त्रीय गायन सर्तीची पयली उपांत्य फेरी फाल्यां, आयतारा, 26 जूनाक सकाळीं 10 वरांचेर वाळपयच्या लक्ष्मीबाई मेमोरियल सभाघरांत जातली. हे सर्तींत वट्ट् धा कलाकार वांटो घेतले. रसिकांक संगीत आनी सुरांची एक वेगळे तरेची जुगलबंदी आयकुपाची संद मेळटली.
अशे तरेची ही सर्त पयलेच फावटीं वाळपय जाता. एके वटेन घोग्यांनी पडपी पावस आनी ताच्या सांगाता कानार सादपी संगिताचे म्होंवाळ सूर रसिकांक मंत्रमुग्ध करतले हातूंत दुबाव ना. एक वेगळे तरेची गायनाची मैफल रसिकांक दिवपाचो आमचे संस्थेचो यत्न आसा अशी माहिती समीर मणेरकार हांणी दिली.
हे सर्तींत धा कलाकार वांटो घेतले. अवि परवार (गोरोबो), चिन्मय कर्वे (कारवार), रामेश्वरी राणे (वाळपय), रोहिणी वझे (वाळपय), साक्षी देसाय (उसगांव), श्रुती सालेलकार (होंडा), सोमय्या गुलाटी (मुंबय), स्वतेजा कुंभार (वाळपय), तनया घाडी (आमोँणें) आनी वैष्णवी बधे (मुंबय) ह्या कलाकारांचो आसपाव आसतलो.
हे शास्त्रीय गायन सर्तींत गोंय आनी महाराष्ट्र ह्या राज्यांतले युवा कलाकार वांटो घेतात. संगिताची आवड आशिल्ले कितलेशेच रसीक गोंयांत आसात. गोंय ही कलाकारांची खण म्हणटात. हे खणींत नवोदीत कलाकार आपल्यो शास्त्रीय गायन मैफल सादर करतले. रसिकांनी व्हडा प्रमाणांत येवन तांकां उर्बा दिवची अशें आयोजक संस्थेन मागलां.
ही सर्त येसस्वी जावची हे खातीर सम्राट क्लबाचे राज्य अध्यक्ष दीपक नार्वेकार, सम्राट संगीत सितारा अध्यक्ष अविन नायक, राज्य पांवड्या वयले सचीव प्रवीण सबनीस, राज्य भांडारी गौतम खरंगटे, कार्यावळीचे संयोजक भाग्यरेखा गांवस, वाळपय क्लबाचे अध्यक्ष समीर मणेरकार, सचीव अंकुश धुरी, भांडारी संजय हळदणकार आनी कार्यावळ वेवस्थापक चंदन गांवस हे खूब मेहनत घेतात.
हे कार्यावळीच्या उक्तावण सुवाळ्याक मुखेल सोयरे ह्या नात्यान गीत रामायण गोंयांत रुजोवपी गायक कलाकार किशोर भावे हाजीर रावतले. समारोप सुवाळ्याक मुखेल सोयरे म्हणून अॅड. यशवंत गांवस हांची उपस्थिती आसतली. हे कार्यावळीक रसिकांनी व्हडा संख्येन येवन कार्यावळीचो आस्वाद घेवचो अशें आवाहन आयोजकांनी केलां.