भांगरभूंय | प्रतिनिधी
उरिल्ल्या बांदकामांचेर 31 जानेवारीक कारवाय जावपाची शक्यताय
भांगरभूंय । प्रतिनिधी
वाळपयः वाळपय नगरपालिका वाठारांतलीं तीन बेकायदो मोडले उपरांत 27 जानेवारीच्यान परतून ही मोहीम हातांत घेतल्या.
मुबारक अली खान हाचें घर बेकायदो आसा. ताका लागून तें घर मोडचें, अशा आशयाची याचिका दाखल केले उपरांत मुंबय उच्च न्यायालयाचया गोंय खंडपिठान हे संबंदांतली सुनावणी घेवन घर मोडपाचो आदेश दिल्ले. त्या आदेशाची अंमलबजावणी 27 जानेवारीच्यान सुरू केली.
सकाळीं पालिकेचे मुख्याधिकारी सूर्याजीराव राणे, सत्तरी म्हालाचे संयुक्त मामलेदार अपूर्वा कर्पे, पालिकेचे अभियंते जयेश कळंगुटकार, पालिकेचे हेर अधिकारी, अभियंते, भौशीक बांदकाम खात्याचे अधिकारी, पुलीस निरिक्षक प्रज्योत फडते हांचे हाजिरेंत कारवायेक सुरवात केली.
मजगतीं, हे कारवायेक त्या घरांतल्यो लोकांनी आडखळ हाडपाचो यत्न केलो, पूण उच्च न्यायालयाचे निर्देश आशिल्ल्यान ही कारवाय बंद करपाक मेळना, अशें स्पश्टीकरण दिवन कारवायेक सुरवात केली.
पालिका वाठारांतली पांच बांदकामां ही पुराय तरेन बेकायदो स्वरुपाचीं आसात. ताका लागून एकामेकां आड हे संबंदांतल्यो कागाळी दाखल केल्ल्यो. शेख दाऊद हाणें मुबारक अली खान हाचें घर बेकायदो आसा असो दावो करून तशेंच मुबारक अली खान हाणें शेख दाऊद हाचें बांदकाम बेकायदो आसा अशें स्पश्ट करून हे संबंदांतली याचिका मुंबय उच्च न्यायालयाच्या गोंय खंडपिठांत दाखल केल्ली.
शुक्रारा सकाळीं अचकीत घर मोडपी यंत्रणा घडणुकेचे सुवातेचेर पावली तेन्ना सगळेच कडेन बोवाळ जालो. ह्या वेळार खान हाच्या घरच्यांनी अधिकाऱ्याक विनवणी करून निदान एक दीस तरी कायवाय फाटीं घेवची, अशी मागणी केली. मात उच्च न्यायालयान स्पश्ट निर्देश दिल्ल्यान ही कारवाय बंद करपाक मेळना, अशें स्पश्टीकरण दिवन कारवायेक सुरवात केली.
मजगतीं, उच्च न्यायालयाच्या आदेशाक सुप्रीम कोर्टांत स्थगिती मेळची, हे संबंदांतली याचिका दाखल केल्या. मात याचिकेचेर शुक्रार मेरेन निर्णय जावंक नाशिल्लो. मेळिल्ले म्हायती प्रमाण 31 जानेवारीक हे संबंदांत आनीक कारवाय करतले आनी वेगवेगळीं बांदकामां मोडटले, अशी म्हायती मेळ्ळ्या.
एकामेकां आड कागाळी
2018 त तीं बेकायदो बांदकामां मोडचीं अशे आदेश दिल्ले. पूण आयज मेरेन ताचेर कारवाय जावंक नाशिल्ली. अखेर एका मनशान हे संबंदांत न्यायालयांत वचून अवमान याचिका दाखल केले उपरांत न्यायालयान ह्या आदेशाची खर अंमलबजावणी करची, नाजाल्यार संबंदीत अधिकाऱ्यांचेर कारवाय करतले, अशी शिटकावणी दिल्ली. हाची विशेश दखल घेवन फाटल्या आठ दिसां सावन हे संबंदांतले कारवायेक सुरवात केल्या. चार दिसां आदीं वेळूस वाठारांतल्या शेख दाऊद हाच्या बेकायदो बांदकामांचेर कारवाय केली. वट्ट तीन बांदकामां पुराय मोडलीं, जाल्यार शुक्रार सावन मुबारक खान हाच्या घराचेर कारवाय सुरू केल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
