भांगरभूंय | प्रतिनिधी
भांगरभूंय । प्रतिनिधी
वाळपयः फाटल्या आठ दिसां सावन दनपारां उपरांत पडपी पावसाक लागून उप्रासपी परिस्थितीचेर उपाय सोदून काडपा खातीर वाळपय पालिका मंडळाची खाशेली बसका मंगळाराक जाली. वाळपयचे बांदकाम खात्याचो अधिकारी गुरुदास गोखले हांचे कडेन चर्चा केल्या उपरांत सकल वाठारांत साठपी उदकाक वाट करून दिवपा खातीर फुडले आठ दीस 24 वरां कामगारांक दवोरपाचें बसकेंत थारलें.
मळबांत अकस्मात कुपां जमून घसघश्यान पडपी पावसाक लागून फाटल्या आठ दिसांत दोन फावट शार वाठारांत हुंवारा सारकी परिस्थिती जाल्याल लोकांक ताचो फटको बसलो. वाळपय सरकारी हॉस्पिटल आनी हनुमान देवळाच्या वाठारांत रस्त्यार उदक साठून तें लोकांच्या घरांनी गेलें. वॉर्ड 3 आनी मासोर्डे वाठारांत हुस्को करपा सारकी परिस्थिती जाल्ली. उदक लोकांच्या घरांनी वचपाक लागल्यार तें आडावन ताका वाट करून दिवपा खातीर पालिकेच्या कामगारांक 24 वरां काम करपाक तयार रावपाक सांगपाचो निर्णय बसकेंत घेतलो.
नगराध्यक्ष सेहझीन शेख हिच्या अध्यक्षते खाला जाल्ले बसकेत मुख्याधिकारी सूर्याजीराव राणे, उपनगराध्यक्ष अनिल काटकार, नगरसेवक रामदास शिरोडकार, विनोद हळदणकार, वसईउद्दीन शेख, फैजल शेख, प्रसन्ना गांवस, निर्मला साखळकार, अभियंतो जयेश कळंगुटकार हांणी पावस परिस्थितीचेर चर्चा केली. कमी वेळांत व्हडा प्रमाणात पावस पडल्यार उदक व्हांवून वचपाक पालिका वाठारांतली गटारांची तांक उणी पडटा. ताका लागून उदक रस्त्या वयल्यान व्हांवपाक लागता आनी परिस्थिती गंभीर जाता अशें रामदास शिरोडकार हांणी बससेंत सामकार हाडलें. गटारां उक्तीं आशिल्ल्यान लोकांक तांचे पसून धोको आशिल्ल्यान तांचेर लाद्यो घालपाची सूचोवणी विनोद हळदणकारान सांगलें.
वाळपय शारांतलो मुखेल रस्तो बांदकाम खात्याच्या अख्यत्यारीत येता. अंतर्गत रस्त्यांची जापसालदारी पालिके कडेन आसा. मुखेल रस्त्या कुशीक गटारांच्या बांदकामाचो प्रस्ताव सरकाराक सादर केला. मात ताका अजून मंजुरी मेळूंक ना. ती मेळोवपा खातीर यत्न करपाक अभियंतो गुरुदास गोखले हांणी पालिका मंडळाक सांगलें. हनुमान देवळा कडेन आशिल्ल्या गटारांचीं तोंडा कोणे तरी बंद केल्लीं ताका लागून थंय उदक तुंबलें अशी म्हायती विनोद हळदणकारान दिली. नगरपालिका वाठारांत आशिल्ले साकोव कमकुवत जाल्यात अशें शेख फैजल हांणी सांगलें. सरकाराक सादर केल्ल्या प्रस्तावाक मंजुरी मेळटगीर नवे साकोव बांदतले अशें गोखले हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
