भांगरभूंय | प्रतिनिधी
भांगरभूंय । प्रतिनिधी
वाळपयः पालकांनी केल्ले मागणे प्रमाण वाळपयच्या जवाहर नवोदय विद्यालयांत 11वीचो विज्ञान वर्ग सुरू करपाचो आदेश मुंबय उच्च न्यायालयाच्या गोंय खंडपिठान विद्यालयाच्या केंद्रीय समितीन दिला. हो वर्ग सुरू करपाक सांगचें हें खातीर पालकांनी खंडपिठान याचिका सादर केल्ली. केंद्रीय समितीन व्हो फांटो सुरू करपा खातीर हाचे पयलींच 35 लाख रुपये मंजुर केल्यात.
सुबोध देसाय आनी राजेंद्र गांवस हांणी पालकांवतीन सादर केल्ले याचिकेचेर अॅड शशिकांत जोशी हांणी बाजू मांडली. विद्यालयांत कला फांट्याचो 11वीचो वर्ग आसा. मात विज्ञान वर्ग नाशिल्ल्यान पालकांक आपल्या विद्यार्थ्यांक काणकोणच्या नवोदय विद्यालयांत वा हेर माध्यमीक शाळांनी घालचें पडटालें. खर्चाचे नदरेन तें परवडना म्हणून पालकांनी विज्ञान वर सुरू करपाची मागणी केल्ली. मात नवोदय समिती ते कडेन आडनदर केल्ल्यान पालक उच्च न्यायालयांत गेल्ले.
वाळपय नवोदय विद्यालयाच्या जमनीचो प्रश्न फाटल्या वीस वर्सां सावन प्रलंबीत आसा. विद्यान फांटो सुरू करप कित्याक गरजेचें आास हें अॅड जोशी हांणी खंडपिठान पटोवन दिलें. वाळपय नवोदय विद्यालय एक बरें शिक्षणीक संकुल आसा. जमनीच्या प्रश्न हो विद्यालयाची मुखेल समस्या आसा. सरकारान लक्ष घालल्यान तो सुटावो जावपाक शकता अशें तांणी तांचे कडेन संपर्क सादलो तेन्ना सांगलें. पालकांची बाजू येसस्वीपणान मांडिल्ले खातीर पालकांनी अॅड जोशी हांचे उपकार मानल्यात.
11वीचो विज्ञान वर्ग सुरू करपा खातीर आमकां न्यायालयांत वच्चे पडलें ही खेदाची गजाल आशिल्ली. निमाणे आमकां न्याय मेळ्ळो अशें सुबोध देसाय आनी राजेंद्र गांवस हांणी सांगलें. वर्ग सुरू करपा खातीर 35 लाख रुपये मंजूर केल्ल्यान जाय ती वेवस्था करपा खातीर सध्या एका कंत्राटदाराची नियुक्ती केल्या. फुडल्या शिक्षणीक वर्सा सावन हो वर्ग सुरू जातलो अशी म्हायती विद्यालयाच्या सूत्रांनी दिली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
