भांगरभूंय | प्रतिनिधी
वाळपय, प्रतिनिधी: रितें आशिल्ल्या वाळपय नगराध्यक्ष पदार प्रसन्ना गांवस हांची विरोधा विणें नेमणूक जाली. आयज घेतिल्ले बसकेंत नगराध्यक्ष पदा खातीर एकूच उमेदवारी अर्ज आयलो. ताका लागून गांवस हांची निवड जाल्ल्याची घोशणा वेंचणूक अधिकारी, सत्तरीचे उपजिल्होधिकारी प्रवीण परब हांणी केली. ह्या वेळार हाजीर आशिल्ल्या नगरसेवकांनी तांकां फुलां तुरे भेटोवन परबीं भेटयलीं.
वाळपय नगराध्यक्षपद बायलां खातीर आरक्षीत आसा. सेहझीन शेख हांणी फाटल्या अडेज वर्सां सावन ह्या नगराध्यक्ष पदाचो भार सांबाळ्ळो. हालींच तिणें पदाचो राजिनामो दिलो. ताका लागून ही सुवात रिती आशिल्ली. ती सुवात भरपा खातीर पालिका संचालनालयान बसका आपयल्ली. तिका वेंचणूक अधिकारी म्हणून सत्तरीचे उपजिल्होधिकारी प्रवीण परब हांची नियुक्ती केल्ली.
प्रसन्ना हांचो एकूच उमेदवारी अर्ज आयलो. ताचेर नगरसेवक वसिय्युदीन सय्यद हांणी सुचक म्हणून सय केली. ह्या वेळार उपनगराध्यक्ष शेख फैझल, रामदास शिरोडकार, शराफत खान, विनोद हळदणकार, सरफराज सय्यद, अनिल काटकार, वसईद्दीन सय्यद, सेहझीन शेख, निर्मला साखळकार हाजीर आशिल्लीं.
फाटलीं अडेज वर्सां प्रमाण नगरसेवकांनी जे तरेन सेहझीन शेख हांकां सहकार्य दिल्लें तशेंच आपल्याकूय दिवचें अशें आवाहन नगराध्यक्ष प्रसन्ना गांवस हांणी केलें. भलायकी मंत्री विश्वजीत राणे आनी आमदार डॉ. देविया राणे हांच्या फुडारपणा खाला येवपी काळांत नगरपालिका वाठारांतल्या नागरिकांक कसलेच तरेच्यो आडखळी निर्माण जावच्यो ना हाचेर विशेश लक्ष दितलें अशें तिणें सांगले. ह्या वेळार मुख्याधिकारी दशरथ गांवस हाजीर आशिल्ले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
